Oté

k’i bate di bèr, lish son doi !

Justin / 20 zwin 2014

Matant Zélida la ékrir Justin :

Mon shèr nové, mon spès salté rouj-de-fon dovan l’éternité, zot lé pa fatigué radoté konm zot i fé dsi lo kont l’IMP, dsi lo kont Sarkozy é dsi lo kont Bigmalion pou la kanpagn 2012 ? Zot la p’asé di lo gran rényon Sin-Pyèr la kout dé-san-mil éro, épi éstèr plis sisan mil éro. Zot i oi pa sa sé in n’afèr i tienbo pa la rout. Lé vré té in gran rényon ! Dis mil pèrsone sa i spass pa san oir. Mé ozis,kosa sa i prouv ? I prouv l’avé dmoun avèk li, é li té bien popilèr. Sa i prouv la vi lé shèr é sa la pa in nouvoté ! Tout fason té pou la bone koz é kan lé pou la bone koz i vo myé bate la min, plito k’port plint la loi. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr.Astèr si mi konpran bien kan in boug i fé parti d’out parti li pé fèr tout épi n’inport de koi. Provik li fé sak li fé pou lo parti ké ou i apèl lo bon parti... Mi souvien bien sak défin papa téi di kan li té i di konmsa, li la vi in bonpé d’moun bien onète aprouv ln movèz aksyon si té pou vanj kont bann kominis. L’onètté i pass apré lo soi dizan bon droi. Mi rapèl mèm in pilyé d’légliz boi d’nèf apré di, li noré bien anfons in fèr sho dann fonnman lo résponsab kominis, alé oir sa té son pti gaté étan pti. Si mi tronp pa matant, madam-la té in pé konm ou k’i pans i pé fé tout z’afèr si sé pou fé gingn la droite... Dakor, mi konpran out manyèr oir lé shoz, mèm si mi aprouv pa... Fransh vérité, matant l’avé pou zoué dann in gro larzan konmsa é de moun malin la bien gonf zot pla san ké zot nom lé mayé avèk sa... Konm di lo kont matant, k’i bate di bèr lish son doi.Tok ! Pran sa pou ou !

Justin

NB In zour mi ariv la boutik. Kat pèrsone apré zoué kart é an parmi inn-dé tèt dir. Inn dan la bann i fé la frod dann zé. Lé z’ot lé pa kontan sof lo boug i zoué avèk li. L’èr-la li di pou son bann z’advèrsèr : Akoz zot i fé l’étoné ? Zot i koné pa lo patoi, k’i di konmsa : k’i bate di bèr lish son doi....Landomin mi rosava la boutik, mi oi lo ga na in pansman dsi son l’indèks é mi aprann son l’advèrsèr la vèy l’avé koup son doi kou d’dan...sirman lo mèm doi li l’avé lishé apré an avoir bate di bèr, konm li mèm téi di..


Kanalreunion.com