Oté

K’i sèm lo van i ramas la tanpète !

Justin / 8 zwiyé 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi suiv azot dopi kék tan é mi konsta zot l’apré ésèy fé pass lo prézidan Didier konm pli mové é zot konm sak na plis la vèrti. Sak lé pa bon avèk kréol sé sa : sak i fé lo bien pou zot, nana touzour in pé k’i trouv a rodir. L’èr-la zot i komans malparlé, malparlé, rakont tou sort éspès de shoz san vérifyé si lé vré si lé pa vré. Nana in gran shèf laba, dann l’almagn nazi, té i di konmsa « Rakont mantèr ! Rakont mantèr ! Va touzour arès in n’afèr. Va tpouzour arès in tash ! ». Tok ! Pran sa pou toi.

Justin la fé pou répons :

Mon vyé matant k’i koz touzour la boush rouvèr ! Ou va éskiz amoin, mél o mansonz – sanm pou moin – sa, mi oi d’apré mon l’éspèryans sa sé in privilèz bann parti lé kont nou sa : kisoi la droit, kisoi mèm la gosh mé konm di lo kont in fos gosh. In pé i invant la mansonjri. Na d’ot i répète la mansonjri. Nana bann radyo avèk bann gran médya i bate tambour la dsi. Aprésa, kisa k’i soufèr ? Sé lo pèp k’i trink. Alor, si i ariv in zour ké baton i shanj de bout, i fo pa fé l’étoné ! Sirtou kan in pé i kroi zot lé tout pèrmi, konm si La Rényon lé a zot ! konm si La Frans lé a zot ! Tok ! Pran sa pou ou !

Matant Zélida la pa lès sa san riyin :

Si mi konpran aou bien na riyink bann rouj lé prop, lé z’ot lé pa prop. Konm di lo kont : alé manj m’a péyé don !

Justin la arfé pou répons

In provèrb fransé pou fini èk sa : Matant « k’i sèm lo van i ramas la tanpète ! »Mi lès aou réfléshi la dsi !


Kanalreunion.com