Oté

Kabri i manz salad, é pou moins lontan ké zot I kroi !!

Justin / 27 zanvié 2016

JPEG - 43.6 ko

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité moin la pans aou in kou. Pou kosa ? Pars out parti rouz, moin la antann dir, lé pliské faye. In pé i domann ziska, kansa i fé son l’antèrman. Mi antan mèm in pé i di li lé inodib : daoir sa i vé dir i antan pi parl dé li, i antann pi ali parlé. Alor mi kont dsi ou pou donn amoin nouvèl pou konète si i fo mi arète parl dé li. I kas pi d’sik dsi lo do lo mor. Tok ! Pran sa pou ou.

Justin la fé pou répons :

Mon vyé matant k’i koz touzour la boush rouvèr. Moin lé bien kontan antann aou mé mi éspèr san tardé out kozman va kass par bout. Pou kosa mi di sa ? Pars lo zour lo z’idé mon parti sar pi valab, sar lo zour tout bann gran problèm La Rényon sar fine trouv z’ot solisyon. Konm par ébzanp problèm kann, problèm travay, problèm lozman, problèm la mizèr, problèm l’ilétrism, problèm nout prodiksyon intèryèr, é tout la shaplé problèm mi pé dégrène dovan ou konm i dégrène shaplé : ti-grin, gro-grin, ti-grin, gro grin…

Mon vyé matant nout parti la fé in program nana vinn-sink poin dodan é so vinn-sink poin-la, sa lé bon pou nou é dann program-la va trouv la klé pou tir anou dann so l’anboulkidi. Pa zordi, pa domin, pétète apré domin, bann rényoné va fini par pran so z’arm-la, dann z’ot min, pou marsh dsi lo rézime in pé l’apré inpoz anou dopi tro lontan.

Kabri i manz salad ? Mé pou moins lontan ké zot i kroi. Tok ! Pran sa pou ou.


Kanalreunion.com