Oté

Kalandryé klimatik, sé sa ki fo a nou

Justin / 26 octobre 2013

Moin té din Konsèy ladministrasyon in kolèz. Mi di mi vé i parl ankor kalandryé éskolèr. Prinsipal bandé an 36 ; kosa ? lo réktèr la fine désidé, pokoué i parl ankor d’sa !!?

Isi nou lé dan in sistèm ou lé a d’mandé si nou pans dabor bann zélèv sinon sa mèt lo kalandryé mèm dat an Frans !

Rant an mars : plipar siklone i pas zanvyé èk févryé, mars, avril lé rar kome korn lapin.

Si ou i di la koupir dan lané lé tro gran ant désanm é mars, alor komans lané éskolèr an mars, fini a li an novanm, konm an Nouvel-Kalédoni, Wallis et Futuna, é tan dot péi tropiko ou sak i fé so.

Alor ti vé fé pas liséin zégzamin an mèm tan bann Fransé, donk a nou travay la nuit.

Apré ti vyin parl a moin « ritm fizyolozik, orloz intèrn, ékilib biolozik ».

A nou pas nout zéprèv kan toulmoun i dor… dine minui. O kilé nout 9 èr somèy po nou èt bien ropozé po arkomans lo landomin !

Lo réktèr i désid sa li fé troi zan, li arsava, a nou nou rès, nou pran an sharz lésèk éskolèr, lilétris, lo somaz, la povrété, linadaptasyon nout sosyété modèrn !

Rant dan in lékol an zanvyé Létan-Salé, ou Lo Por ou Sinbénwa milyé d’zourné… bon ta mèt vantilatèr, klimatizèr, ar iz kouran léktrik, la komine va péyé !

Méyèr tan lané « zilyé, out, sèktanm », sé la ké lo zélèv lé pli pèrforman, ti mèt a li an vakans ! A koz ? A, po fé konm an Frans ! Mé nout résponsab i wa pa bann sézon lé inversé, nou lé dan lémisfèr sid, pouatan i apran sa lékol !

Mèt nout kalandryé an dalonaz èk nout klima, sa i apèl kalandryé klimatik. Foutor !

Justin


Kanalreunion.com