Oté

Kalbas amèr i suiv la rasine !

Justin / 5 désanm 2014

Pou in bon nouvèl, sé in bon nouvèl ! Myé ksa i pé pa ! Outor lé tro fasil krétik bann sosyété fransèz, nom azot sosyété kolonyal ! Armète in koush pou nonm azot lésploitèr lo pèp rényoné. Pou in kou, sak i pans konmsa i sora blijé tak zot kadna : in poin sé tou !.. Pou kosa mi anparl de sa ? Moin k’i konsidèr amoin konm in fran kominis, in rouj de fon konm mon matant Zélida i di souvan dé foi.

Pars, figuir azot, mi sort lir dsi l’internet Lo sosyété Téréos avèk in sosyété dalon dann l’Amérik la déside fé in gran l’izine pou fabrik la bétaïne natirel. Kosa i lé sa d’apré zot ? Alé ogard an parmi médikaman zot va oir in n’afèr i apèl sitrate dé bétaïne é sa i ansèrv pou amlélyor la dézéstion. Bin, figuir azot Téréos avèk sonn dalon Dupont la désid fé in gran lizine pou produi in n’afèr konmsa. Lé bien, lé pa bien ? Myé ksa i pé pa. Pars, konm zot i koné, lo bétaïne natirel sa i pé sort dann kann konm dann bétrav a sik .

Sof ké !!! La pa isi va fé sa, mé dann in kartyé i apèl Origny-Sainte Benoite, l’androi nana lo pli gran sant mondyal pou distil la bétrav. Sé Téréos va fé sa avèk konm mi di azot Dupont épi Novasep Prosès. Moin k’i pansé téi tard pa mi sava trouv dsi in médikaman lo nom mon péi, mi pé dir azot moin lé dési-dési-dési. Mé arien demoun va konète mèm si i fé pa, lé posib fé médikaman-la avèk nout kann La Rényon.

In kozman pou la rout : « kalbas amèr i suiv la rasine ! ». 

Sain kozman pou paran avèk zanfan. Si lo paran sé mové moun, lo zanfan lé riskab ète mové moun osi. Konm di lo kont : « tel père, tel fils ». Pou arvir dsi la késtyonn kann ; si mi tronppa Téréos la pran la suit bann gro blan é bin li fé parèy. Li sousyé pa d’mète nout péi an valèr. Fé travay zot tète, fé shof zot matyèr griz, moin lé sir zot va trouv de koi pou dékor nout kozman.


Kanalreunion.com