Oté

Kan Bondyé i vé pèrd in moun, li komans par fé pèrd ali l’èr !

Justin / 18 zwin 2014

L’avé inn foi in prézidan konsèy réjyonal. li la trouv dsi son parkour in problèm i égzis dopi ké na d’moun isi La Rényon. Koman joinn l’ouès nout péi avèk lo nor ? Biensir nana la rout la Montagn mé lé long, tournan an poundyak é pou fé douz kilomète té i fo fé trann sis. Biensir l’avé lo trin, mé sa i date pars in pé la désid siprime ali san bien rogard lé konsékans… sansa an rogardan bien larzan sa té i pé rapport pou zot ! Nana in rout litoral... zot i koné ! Mé pa zordi, pa domin in bèl débouli lé riskab kapote ali dan la mèr épi mark "fini" dsi son fron. Sa bann zéspèr la di é ni koné sa lé vré pou vréman ! Pa zordi, pa domin.

Donk l’éta la désid donn la rout la Réjyon, pou tir in gran zépine pagot dann son pyé. Lo prézidan nana la sazès pou rovann. Li la di : "Sa in kado anpoizoné sa ! I fo l’éta i rofé ali tèl fason ké d’moun lé an sékirité dsi, pa in zour, pa dé zour, mé plizyèr santène z’ané, é sé l’éta ki doi péyé pou la kouyonad li la fé. Diskisyon-négosyasion,négosyasion-diskisyon la fini par trouv in térin pou antann : l’éta i rofé son rout litoral, é la réjyon i fé son tram-train. Konmsa nou na dé kord dsi nout flèsh, é si inn la manké- konm di lo kont : "La kord i pète koté li lé faye !".., l’ot lé la pou ranplasé lo tan k’i fo pou armète lé shoz dan l’ord.

Mé oila, in bann konplotèr la désid fé pèrd lo prézidan lo zéléksyon l’ané 2010 é in jenn prézidan, tou an boté, tou an zénès, zargo a penn pousé, la pran la plas é li la obli la sazès lo l’ansien prézidan. Li vé pi lo trin, li vé in rout dsi la mèr. li rod galé mé li trouv pa. Li pans mèm fév ni galé dopi Madégaskar. Arzout èk sa,li vé fé pass sète san kamiyon par zour dan la vil Lo Por… Désèrtin i tir lo signal d’alarm épi i di ali artrouv out rézon- songn aou avèk kat grin lélébor, konm di La fontaine ! Mé li lé antété, li vé pa arvni rézonab. Li vé son rout dsi la mèr é li éspèr kan va kapoté li sar pi la pou rann kont.! Lé tro shèr, li s’anfou ; tanpir si bann zénérasyon k’i vien sar blizé vann zot dèrnyé shomiz pou pèy sa.Li la pèrd la rézon !Li la pèrd l’èr ! Konm di lo kont, kan Bondyé i vé pèrd in moun, li komans par fé pèrd ali l’èr, é moin la bien pèr ké li la pèrd sa, définitivman !

Justin


Kanalreunion.com