Oté

« Kan dé z’éléfan i bataye sé lo zèrb k’i pran lo shok ! »

In kozman pou la rout

Justin / 10 séptanm 2016

Biensir sa in provèrb i sort pa shé nou. I di sa in kozman l’Afrik, mé i pé z’ète osi l’Azi pars la-ba nana zéléfan. Mé a bien kalkilé kosa sa i aport anou konm réfléksyon ? Kékshoz sinp sanm pou moin. Kékshoz k’i di anou si dé grann puisans l’apré fé la guèr inn kont l’ot, sé bann ti k’i gingn lo kou, mèm si zot lé pou rien dann sèt afèr. La prèv ? Na plis sivil koméla i mor dann la guèr ké nana solda. Késtyon dsi la polisyon : mèm si ou lé pou arien dann lo dérègleman klimatik sé ou ké va soufèr, sé bann ti péi é bann pèp pov ké va soufèr plis ankor ké lé z’ot, bann vré résponsab. Donk i fo pa mèl dann in bataye rant bann gran ! Zot va touzour trouv in l’aranjman dsi out do la plipar d’ tan. Sé sak Ollivier Bancoult i réponn kan i di ali shoizi rant L’Anglétèr é l’il moris. Li la réponn li shoizi lo droi pou bann shagosien artourn shé zot in poin sé tou, lé z’ot problèm i konsèrn pa li, dann son politik rovandikasyon. Ala in sizé d’réflèksyon pou zot é néna pou kass la tèt la dsi. Ni artrouv pli d’van si sa i di azot késhoz !


Kanalreunion.com