Oté

Kan i pran larzan pou bondyé

Justin / 13 zanvié 2011


Dépi in bon koup de tan, dann l’aktyalité, i parl in médikaman i apèl Mediator. Sa in médikaman bann moun na diabète téi pran. Mi di "té i pran" pars koméla sa in médikaman lé défandi. Produi-la, laboratoir Servier la mète o-poin. Demoun i domann akoz li lé défandi arienk koméla, vi k’déssèrtin péi la interdi sa dépi in bon pé d’tan.
Zot i koné pou pèrmète donn demoun in trètman, i fo lo tan. Par-la douzan d’apré sak mi sort antann. Pou rotir lo produi, si li lé in pé danzéré, i mète galman in bon pé d’tan. Mèm parfoi, d’apré sak bann zournal i di i éspas in trikmardaz anndan. I di mèm, larzan i roul sou la tab é bann laboratoir i aroz inn-dé parti politik bien inportan.
Pou lo Médiator i di konmsa laboratoir Servier té i done in bon moné l’UMP. I di mèm laboratoir Servier té i fé parti lo promyé sèrkl bann donateur parti lo prézidan Sarkozy. Ala k’in zournal la France, "Le Canard enchaîné" i rakont, dann l’antouraz Xavier Bertrand, minis la Santé, dé gran médsin*, té i travay ossi pou laboratoir Servier.
I paré sa i apèl in konfli lintéré. I pé dir, sa i mank pa an parmi lo gouvèrnman. In gouvèrnman i pran larzan pou son Bondyé.
* Bann proféssèr Gerard Bréart épi Françoise Forette, konséyé lo minis.

 Justin  


Kanalreunion.com