Oté

Kan l’ariv l’èr pou lo pèp done aou rézon, li done aou rézon

Justin / 4 mars 2016

Lo tan d’avan té méyèr ! Non mi pans pa lo tan d’avan, i fo mète ali anl’èr é lo tan d’zordi i fo tir son moushoir pou plèr d’dan. Pou komansé pou inn bone rézon : konm i di, i shanj pa d’pèp tan ké lo pèp i vé pa shanj par li-mèm. I pé shanj lé shoz, mé lo pèp lé la, é sé avèk li é pa kont li , k’i fo shanj lé shoz : sa la pa solman in késtyonn pédagoji, sa la pa solman inn késtyonn kominikasyon, mé kan l’èr l’arivé pou lo pèp done aou rézon, li donn aou rézon mé si ou i prépar pa lo zour-la, li ariv arpa zamé.

Pou kosa mi di sa ? Pétète pars sé la nuite é la nuite lé pli fasil antann sak i éspas dann out tète é tout bann rotour la sosyété i anvoy pou ou, é lé pli fasil réfléshi dosi. Vi k’la nuit, la poin-konm De Gaulle téi di-lo tohu-bohu k’i anpèsh aou bien réfléshi la zourné… mi késtyone amoin dsi domin, forséman dsi zordi épi dsi yèr. L’èr-la mi di nana lo tan l’istoir i avans vit, nana lo tan li patine pars li l’apré prépar ali pou démaré. Konm moin lé optimist mi kroi pa é mi mète dé koté lo tan pou fou dann fon, mi kroi lo tan pou listoir ardémaré lé pa loin arivé.

Somenn isi, moin la lir i kozman in bon kamarad, kaziman in famiy la déklar dann zournal do l’il. Li la di, l’èr k’i lé, lo parti kominis lé mor é moin mi pans nout parti nana in listoir éstraordinèr, mi pans li nana lo méyèr program tout parti nana isi La Rényon. Sanm pou moin li la touzour konbate é li konbate touzour pou nout libérasyon sosyal épi pou nout libérasyon nasyonal rényonèz [1]. Mi pans si la fé in révolisyon kiltirèl shé nou, sé par li é pa otroman. Sanm pou moin galman l’èr l’arivé pou lo pèp done ali rézon pa bout-par-bout mé globalman.

Si sak mi di lé vré, mi pans ni tard ar pa pou oir énète in zénérasyonn pou port nout flanbo dann l’inyon rant tout bann rényoné i domann k’i shanj lé shoz pou vréman. Kansa ? I apiy pa dsi in bouton pou déklansh lo shanjman ! Mé konm moin la fine di lo tan pou lo pèp done anou rézon la pa loin pou arivé.

[1Konm Nicole Robinet de La Serve, in fran kréol rokoni dann son tan, téi di, li nana dé patri La Rényon épi La Frans. Moin lé konm li. Mi pans konm li é mi kroi sé sa l’avnir pou nout péi.


Kanalreunion.com