Oté

Kan le militan i sava...

Justin / 8 zanvié 2011

Biensir, nou lé pa la pou toultan dsi la tèr. Biensir, sé in loi la natir é ni pé pa fé arien pou shanjé. Mé soman, kan inn rant nou i sava, pou sak i rèss, la sé in gran déshirman, in gran shagrin, in gran tristès. Tèlman lé z’inn avèk lé z’ot nana souvnir ansanm, tèlman nana in transh la vi ansanm.
La vi lo militan lé konmsa galman.
Shak moun nana son bann z’ami, son bann frèr, son bann sèr, son bann dalon. Li partaz son vi, son bon konm son mové nouvèl, son pti bonèr, son l’annuiman, lo pti konm lo gran. Nana arienk son moun i koné ali bien, i pé mèm prévoir an avans sak va rann ali kontan, va fèr ali d’bien, sansa sak va fé ali d’tor, va rann ali malèz.
La vi lo militan lé konmsa galman.
Mé kan ou la pass toute in vi a défann la koz lo pèp, kan ou la pass toute in vi avèk dann out tète, matin o soir, soir o matin, ané apré ané, l’intéré out pèp, l’intéré out péi, lé forsé ou nana in kantité dalon, in kantité kamarad. Dé foi ou i koné azot bien. Dé foi ou i koné solman de nom. Dé foi ou na solman lo souvnir in konba ou la mène ansanm-avèk. Mèm, kanstéti in rényon, sansa in rasanbloman ou lété anparmi, li lété an-parmi, zot lété ansanm-avèk. In foul de moun an finn-kont !
L’èr-la, forsé, pou toute so moun, ou i lèss, dann zot kèr, in plas vide kan ou i sava dann l’ot koté la vi. L’èr-la, lé oblijé, i rèss in plas vide kan lo militan i sava.

 Justin 


Kanalreunion.com