Oté

Kan Madégaskar nora 55 milyon demoun, Nou nora in n’ot kalité rogar dsi zot !

Témoignages.re / 13 janvier 2014

Na in n’afèr mi siport pa, sé sak i apèl rasis. Pou kosa ? Pars dann mon famiy la touzour di amoin, sa la pa bon. Arzout èk sa moin la konète ali isi La Rényon, moin la konète ali osi dann péi déor. Na in bon koup de tan moin la gingn lokazyon pass dann in péi l’avé lo ban pou blan, lo ban pou koloré, magazin pou blan magazin pou koloré. Mèm dann légliz, moin la parti fé in pti sign do kroi lété konmsa. Donk nou lé dakor épi lo rasism sa lé pini par la loi, boudikont in déli, konm i di.

Pétète zot i pans mi sava anparl azot Dieudonné ? La pa lo ka, pars mi èm pa koz san réfléshi... Sak mi vé anparlé, é moin la antandi, sé lo ka in moun l’outre-mèr la parti travay dann bann shantyé naval dan La frans é aforstan demoun téi moukat ali, li la afayi si tèlman li la rant dann in déprésyon. Sa lé vré pou vréman pars son l’avoka la fé kondane l’antropriz pou arsèlman moral é la transform son démisyon-pars lo ga té blijé démisyoné !-an lisansiman.

Dsi Facebook, moin la vi in zafèr i fé pa rir. L’afèr in moun la pète in kab dan la post épi la mète a angèl bann zétranjé, bann malgash dann ta. In moman,
partou bann rényoné té i mal parl bann maoré, épi bann komorien. Zordi moin na konm lo linprésyon sa lé in pé moin for mé pètète mi tronp, mé sak mi koné sé lo rasism kont malgash la goumant inn-dé kran. Pou kosa, Alé savoir pars jir bann malgas sé jir anou nou mèm vi k’la plipar rant nou nana in lansète malgash, zésklav ou sinonsa zangazé. L’èr-la in lidé i vien dann mon tète : in tan l’avé sak té i apèl bann lib dé koulèr ébin figir azot banna lété rasis vèy pa koman.

Moin lé a d’mandé kan demoun i kritik malgash si dann fon zot kèr zot i roprosh pa in pé zot zansète an avoir été pov, zésklav ou sinonsa zangajé pou an avoir pa fé sort azot dirékto dann la kuis Jupitèr. Sé in l’idé dan moin ! Sé in késtyon dan moin ! Solman zordi nou lé l’ané 2014, é kan v’ariv 2050 nora 55 milyon demoun Madagascar, é lo péi nora- mi éspèr !- fine lèv la tète. l’èr-la nout désandan, moin lé sir, va oir Madégaskar in n’ot fason,..sa lé sir !

Justin


Kanalreunion.com