Oté

Kan mi lir dé shoz konmsa, mi pé dir azot, mi panik grav !

Justin / 29 zwin 2015

Moin lé sir, konm moin, zot i suiv in pé so késtyonn dérègloman klimatik. Lé vré, lé pa vré ? Touléka mi pé dir azot, tazantan mi lèv la nuite pou rann amoin kont, par moin-mèm, si d’lo la mèr la pankor ariv dovan mon port… Kan té i anparl la otèr la mèr i sava mont in mète, moin té pa tro trakasé. Kan la di in mète sinkant, mon fyèv la komans déklaré. Parl pi astèr i di va mont sis mète, moin lé pi bon, moin lé pi bon ditou.

Mon kamarad Zanbash la di amoin li lé pa trakasé li. Myé ksa li lé mèm kontan. Pou koué ? Pars, solon sak li di li nora pi bézoin désann an ba laba Sint-klotid pou li alé la pèsh golète. Li di mèm li sré kontan la mèr avèk son poison i mont près ziska son kaz, konmsa li pé alé la pèsh pli souvan é tazantan rant la boutik pou toush inn-dé pti. Sanm pou moin li oi lo boutik in koté, la mèr l’ote koté. Li oi déza lo tablo é sa i sanm fé plézir ali.

Mi pans pa, vi son l’az li va oir in n’afèr konmsa. Pars sa va mète lo tan pou monté firamézir… I montar pa an in zour kant mèm ! Mé konm mi di domin sé zordi k’i prépar é mi antan pa l’apré préparé. Pir ksa, i kontinyé batir, i kontinyé fé la rout san kalkil lo danzé… Poitan gouvèrné sé prévoir ! Donk nou lé pa gouvèrné alor ! Touléka, mi pé dir azot kan mi lir kékshoz dsi lo dérègloman klimatik, mi pé dir azot mi panik, é mi panik grav !


Kanalreunion.com