Oté

Kan ou giny pa lèv par kat, ou lèv par dé !

Justin / 14 novanm 2013

Sa la rant dan mon tèt konm in proverb ! Moin té ankor marmay, mon gran-frèr i koup kann, a moin mi lèv, mi devé avoir 9 an, lo vyé i aport kann tabisman dépi lo matin, li ariv si o kou troi zèr a pé pré, li argard a moin lèv kann si mon zépol po port si lo bor somin, a moin dépi lo matin mi grat mon ki, mi rogard bann mous a myèl koman i sus sous kann, mi lantèrn tan pir ki pé, mon gran-frèr i arèt pa di a moin : « a ou dégaz pa ou, talèr papa i ariv, ou i sar giny kokman... », sa ki fé mi débrouiy in pé, astèr moin lé konm lo lièv la fab, mi vé artrap lo tan pèrdi, mi vé travay vitman, mi mèt par gro paké, mé baya, lo bann tiz kann i tonm par dovan, par dèryèr, i pins mon po d’bra, mi énèrv, mi zèt tout dan la pay, mi ar angèl lo brasé, oté ! moin lé pa kontan.

Mé na in boug asiz sou pyé boi d’golèt la po vèy a moin koman mi travay, sé mon papa : kan ou giny pa lèv par kat, ou lèv par dé !

Sa in léson la rant dan mon tèt, ziska zordi la pa sorti. Ou i pé aplik a li tout sort sitiasyon, mèm an tan ke gran moun, alé pa pli vit ke lo violon, si ou na 5 éro, alé pa asèt po 10 !

Justin


Kanalreunion.com