Oté

Kan ou i koné pa, ou i koné pa ! Kan ou i vé pa konète, ou i koné pa !

Justin / 11 mé 2015

Zordi dimansh, mi rouv mon radyo, pou konète in pé lo ladi-lafé. Kan mon léspri lé vid sé konm sa ké mi fé. Shakenn son manyèr ! Shakenn son défo ! I fo fé lo vide tazantan, kan ou sé in moun rodinèr. Donk, mi rouv lo radyo é oila ké mi antan in n’afèr pa rodinèr :

In moun i sonn téléfone dann lo post ; li prézant ali : mi apèl intèl. Dopi sizèr so matin moin lé anmaré avèk griyaz la proféktir. L’èr-la, lo l’animatèr i domann ali afèr. Ala ké li réponn, moin la anshène amoin, pars zordi dis mé é moin la domann mésyé Préfé, fé la komémorasyon zour-la. Nana kék z’ané mi domann ali sa é li anvoy amoin baladé. Lo l’animatèr i domann kosa l’ariv lo dis mé ? Lo moun i réponn sé lo zour la komémorasyon lésklavaz é la trète lé konsidéré par la loi konm in krime kont l’imanité. La polis la fine vnir pou rolèv mon nom é astèr mi atann la suit.

Lo l’animatèr i di ali, mé sé lo vin désanm i fète l’abolisyon l’ésklavaz, lo dis mé sé pou la métropol. Lo boug i di ali : « Dabor la métropol pou li sa i égzis pa épi sé la loi k’i domann in komémorasyon ofisyèl ! ». Lo konvèrsasyon dann téléfone i arète la, é lo l’animatèr i ardi : lo dis mé sé pou la métropol é vin désanm sé pou nou.

Miarète tèrla, mé mi domann amoin kosa sa i vé dir : pou moin sa i vé dir lé pa fasil fé konète demoun in date mèm si sé in loi k’i mark so date-la... sirtou si bann médya i fé pa in kont sanm sa. Dézyèmman, mi pans lo préfé i mète ali dann l’ilégalité si lé vré ké dopi 2008 li na l’obligasyon par l’éta komémor so dat-la. Mi di bien si sa lé vré... Finalman, konm di lo kont, nana sak i koné pa pars zot ikoné pa, é na sak i koné pa pars zot i vé pa konète.

NB Sin-Pol, yèr, bann kamarad la komémor lo dis mé. Félisitasyon pou zot. Mi pans sa va vnir o firamézir.


Kanalreunion.com