Oté

Kan zot va antann parl bann Rom, obliy pa sa !

Témoignages.re / 12 juillet 2013

Mi pans, konm moin, zot la antann la-ba dan la Frans la mizèr i fé bann Rom. Sa lé vré pou minis lintèryèr sosyalis, pars li done pa son par lo shien dan son réprésyon, épi sa lé vré dan la droit : JM Le Pen i trouv banna i done ali lirtikèr. In sèrtin Estrosi i anons li nana son téknik pou bat banna déor. Son kozman té si tèlman vyolan k’in bonpé d’moun la fé la romark. Zot i koné Estrosi ? Lété minis dann tan Sarkozy é lété an parmi sak la antèr nout tram-trin. Aprésa, li la mèt lo tram in pé partou dan la vil li lé lo mèr... Sak lé bon pou bann Fransé lé pa bon pou bann fonsé daoir !

Zot va dir amoin pou kosa mi parl dé sa ? Pou kosa ? Pars partou demoun lé maltrété nou lé konsèrné. Partou in moun lé viktime linzistis, in kominis rényoné i doi zète konsèrné. Arzout èk sa, bann Rom, sé in bann sitoiyin l’Erop, solman la loi éropéène i aplik pa pou zot mèm manyèr ké pou lé zot… donk in bann Éropéin dézyèm zone. Nana in bon koup de tan, l’Erop la vot in bidzé pou èd banna dan zot l’insèrsyon : i paré bann péi la toush so l’èd-la la dépans larzan in n’ot manyèr é bann Rom la pa gingn arien la-dan.

Astèr mi doi zot dé mo lésplikasyon : figir azot, bann Rom, sa bann moun dann tan lontan té i viv dan l’Inn, é zot lang, lo roumin, sé in varyété d’sanskri, promyé lang bann z’Indien. Koman-koman bann Rényoné lo bann zansète té i sort l’Inn nana in dégré d’paranté avèk zot. Konm de koi la tèr sé in vilaz, é partou-partou nou nana konm in l’èr d’famiy. Donk kan zot va antann parl bann Rom, oubliy pa sa !

NB : Mésyé Estrosi i gaskone bann Rom dsi zot zoli loto épi dsi zot zoli karavane, konm si banna la ging sa in fason malonèt. Poitan sak i koné in pé bann Rom i koné, kan zot i maryé, in koté d’famiy i done loto, l’ot koté i done lo karavane. Boudikont, sé zot kaz, dé foi landroi zot i travay, ou sinonsa zot i transport zot zoutiy. Mi oi pa kosa lé malonèt la-dan !

Justin


Kanalreunion.com