Oté

Kann-la, sa va èd anou fé nout l’avnir !

Justin / 31 juillet 2013

Matant Zélida la ékrir Justin :
Mon shèr nové, mon spès salté, rouj-de-fon dovan l’éternité,
Si mi konpran bien, sé kann koméla zot l’apré vanté. Kann lé si, kann lé la, i pé fé sosi, i pé fé sola. Poitan, vi koné bien, konm out momon, moin la travay dann karo kann é promyé l’opinyon moin nana dsi li, sé ké li sé in kiltir pénib. Ou i dépay ali, li koup aou san ménazman. Ou i koup avèk out gran kouto, divé i antèr dann out po, dann out shèr. Ou i transport sa par paké pou sharj sharèt ou bien kamiyon, i kass out rin é pa pou fé sanblan. Si ou i travay vréman dann kann san ménaz out fors, é bin étone pa ké ou i viéyi avan lotan, é ou i lès out santé la-dan. L’èr-la, mi invit aou arèt vanté in n’afèr ké lé pa vantab. Tout fason, ou i souvien sak bann z’ansien té i di, si ou na poin bone tèt pou fé d’ot métyé, ou i sava grat kann. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
I étone pa moin ou na sèt opinyon-la dsi la prodiksyon kann. Ou i rapèl koman sa lété dann tan é ou tienbo pa kont sak li lé zordi. Matant, la métod travay la fine shanjé, kisoi la métod kiltir, kisoi la métod pou angrès lo plant, kisoi ankor lo métod pou koupé, pou transporté, é tout zitilité i pé tir la-dan. Matant, kan dan l’ané 1969 la fédécanne la sign in akor avèk bann z’izinyé, kan li la di ni vann nout kann mèm pri ké lo sik i tir d’dan, na in pé la bat la min. Pou kosa ? Pars zot té i oi pa pli loin ké lo bout zot né. Zordi, firamézir, ni apèrsoi i pé tir d’zafèr dann kann, ké sa sé in rishès pou nou... Mon vyé matant, mi promèt aou kann va èd anou fé nout l’avnir. Ou i vé, ou i vé pa, mi pans sar konm sa é pa otroman. Tok ! Pran sa pou ou !

Justin


Kanalreunion.com