Oté

« Kanot pèrsé, in bon z’anpone la p’asé »

In kozman pou la rout

Justin / 2 mars 2016

Zot i koné kosa i lé in z’anpone ? Sé in l’anvlop palmis pou tir d’lo dann kanot pars lé pa rar kanot lontan téi lès in pé d’lo rantré. Mèm parfoi té I mète in trou éksepré avèk in shoviy an boi pou dévid lo kanot kan la fine ariv a-tèr. Touléka, zot I oi in pé lo ka : bann fransé I di I fo ékopé-ékopé sé tir d’lo avèk in z’anpone, défoi I ansèrv in mok konsèrv.

Pou rovni dsi nout kozman : dé foi kanot la vi, konm zot i koné, lé dann difikilté : difikilté d’travaye, difikilté d’santé, difikilté d’ménaz, difikilté d’la vi.L’èr-la pou romète lé shoz droit lé pa fasil, mèm lo méyèr tizanèr i gingn pa tir aou dan lo ka. Sé l’èr k’nout kozman d’zordi I pé ansèrv anou.

Sé l’èr pou armète lé shoz droit, konm di lo kont, mèm in bon z’anpone sifi pa : lé zis konm in kotèr dsi in zanm de boi. Aya, mé z’ami ! Na dé foi konm I di, ou lé pri dan la min korbo.


Kanalreunion.com