Oté

Kansa bann sportif nora la rokonésans zot i mérit ?

Témoignages.re / 6 désanm 2013

Dann l’éspor pou trap in bon nivo lé pa fasil... lé mèm bien difisil. Dizon, i fo ou nana lo talan k’i fo mé pa solman. I pé mèm di dann la réisit nana dis pour san pou lo talan é katrovin dis pour san la transpirasion é sa i dir in kantité z’ané... si out santé i vé bien suiv, si laksidan i vé bien évit aou. Donk kan ou la vni abou travèrs tousala ou lé kontan, out famiy lé kontan galman, demoun i bat la min, ou lé vanté. Si ou i sort La Rényon nou lé fyèr é ni di : "La mète La Rényon anlèr !". 

Bien bon tousala ! Mé kan lo tan l’arivé pou ou gingn out soso par ou mèm kosa k’i éspas, par égzanp si ou fé in éspor konm jido. Kosa k’i éspas kan ou lé an finisyonn karyèr. Mèm si ou lé ankor for, si ou la gingn méday in pé partou, si ou la gingn méday dann troi shanpyona l’Erop, si ou la parti Zé Z’olinpik dann La Shine, dann L’Anglétèr, si ou lé ankor shanpyon dan La Frans. Kosa i pé ariv aou ?

Out fédérasyon i okip de ou, i rod in bon kontra pou ou. Anfin in bon kontra !!... I fo pa égzazéré non pli, pars 1.800 éro, sa la pa l’or an bar… 1.800 ou sinonsa arienk 800. Sé sak i ariv in gran shanpyone jido. Moin lé sir zot la fine antann son nom. Moin lé sir zot la fine antann bann zournalis apré di, èl i roprézant in léspoir d’méday, èl i roprézant léspoir lo pèp La Frans dann tèl shanpiona. El i apèl Laetitia Payet é zordi èl na vint-uit an…

Fatigé afors atann son fédérasyon i ofèr aèl in kontra pou gingn 1.800 éro... mèm sa èl i gingn pa : na poin pou èl… fatigé gingn in léspès CES, 800 éro par moi, èl i koz dann zournal "Le Parisien" pou dir èl i anpé pi, èl i arèt avèk lo jido o nivo, èl i désid lans aèl dann la vi aktiv konm i di... Pétète dann bann gran konpétisyon i antann ar pi di son nom, i dir ar pi, èl sé léspoir d’si, d’la, d’in méday pou La Frans, pou lonèr lo drapo... Dakor, mé i fo gingn sa vi kant mèm !

Moin lé a d’mandé kansa La Frans konm désèrtin péi, va okip in pé myé son bann shanpion. La rokonésans ? Sa in mo i korsh pa la boush sa kant mèm !

Justin


Kanalreunion.com