Oté

Kansa gouvèrnman La France, li osi, Va domann anou éskiz ?

Justin / 23 octob 2012

Zordi, moin l’apré pans in n’afèr. Moin l’apré domann amoin si gouvèrnman La France i doi pa bann Renyoné dé mo d’éskiz. Pou kosa ? Pou lo mal la fé anou pandan la pèryod la frode épi la réprésyon. In pé rant zot, moin lé sir, i doi di sak lé déyèr nou, lé déyèr nou... La pa bézoin rofé viv lo passé, la pa bézoin arfé viv lo mor.

Moin pèrsonèlman, mi pans pa konmsa é mi koné in pé rényoné blésir-la, lé gravé dann zot shèr. Moin lété jenn, dann tan-la, mé sa moin la vi, sak bann z’ansien la sibi i arsanm pa, mèm de loin, sak i apèl la démokrasi. Dann mon pti modékri, sak mi ékri zour apré zour, moin la fine parl sak moin la vi par moin-mèm, sak moin la tandi par moin-mèm : mové moun, nèrvis, an tou tan, nana sa. Mé mové moun avèk nèrvis apiyé par bann fors in pé i apèl dé l’ord, sa na poin toulézour. Na in ga téi apèl Cluchard té ki diriz bann nèrvis épi bann kass-an-fèr pou fé gingn la droit dann la vil Lo Por. Sintandré, lo shèf ransègnman zénéro, i sèr la min bann shèf nèrvi. Mové moun nana, nèrvis nana, mé mové moun avèk nèrvis ankadré par bann fors de l’ord sa in n’afèr moin la vi, moin la tandi parlé, é sa sé in n’afèr, mi gingn pa obliyé.

Pou tout sa-la, mi pans gouvèrnman La France i doi anou zéskiz. Bien sir, in pé i pans, la frode sa in déli é déli-la, la fine passé avèk lo tan. Mé, kan mi kalkil, lo déga li la fé dann mon kèr épi sète mon famiy, épi sète tout bann militan, éskiz amoin, mé zamé d’la vi, moin va pran sa pou in péshé vényèl. Zamé d’la vi, m’a prann sa konm ki diré lo dsi fèy sonj... In pé, mi pans, i doi kalkil, vi k’la fé z’afèr konmsa bann kominis é bin la pa grav. La pa grav ké zot i di ? Lé touzour grav in l’agrésyon kont in pèp. Sé pou sa, mi pans, mi pans épi mi di, La France i doi anou dé mo d’éskiz. Kansréti, pars la anpèsh lo pèp rényoné trap son mazorité. Sa la pa grav sa ? Pliké grav, sé moin k’i di azot.

L’èr-la, l’idé i vien dann mon tète pou domann François Hollande dé mo d’éskiz pou sak l’administrasyon fransé la fé lo pèp rényoné.

 Justin 


Kanalreunion.com