Oté

Kansa in vré l’ékol rényonèz pou bann z’anfan rényoné ?

Justin / 1 zwiyé 2016

Nana dé z’ané é dé z’ané, in bann amontrèr progrésis la réini pou form l’ékol rényonèz. Sa té in groupman sindikalis téi rode lo méyèr solisyon pou an avoir, isi La Rényon, in l’ékol de kalité. Mi sava pa ardi z’ot propozisyon, mé, inn mèm pars li amontr banna té i fé bann propozisyon rézonab.

An zot mèm, zot la di La Rényon lé dann klima tropikal é dann la plipar bann kartyé kan la shalèr i shal ébin lé pa fasil pou travaye lékol. La pa fasil pou bann z’anfan. La pa fasil non pli pou lo bann z’amontrèr. Mi rapèl kan moin lété l’ékol kisoi lo pti, lo moiyin sinonsa lo gran désèrtènn foi lo l’apré-midi té in kalvèr pou travay dan l’ékol. Kan moin lété kour moyin l’avé in tèrmomète dan la klass é shak marmaye, son tour té i sava oir ali pou mark dsi tablo la tanpératir. Moi d’désanm l’avé dé foi plis trann sink dogré, mèm trann-sète, trant-uit.

Alor nou té i aprann vréman, sansa nou téi fé sanblan ? L’intélizans i suiv pa, la mémoir non pli é kan téi ariv lo soir la métrèss ké lété mon momon téi poz késtyon ébin na dé zour nou té ariv pa réponn. Pa par kouyonis, mé pars la shalèr l’avé touf anou. Alors, mi domann kansa nora in bon l’ané éskolèr, in l’ané klimatik pars si nana sa dann La Frans égzagonal isi nou la poin-konm nou na poin l’égalité bien antandi !

Kansa ? Kan kok va gingn lo dan ? A moins ké l’ékol sé in n’afèr tro séryé pou konfyé sa l’édikasyon nasyonal. L’èr-la I fo pétète sé lo pèp k’I pran lo pouvoir pou fé in l’ékol rényonèz pou bann z’anfan rényoné.


Kanalreunion.com