Oté

Kaziman i fèy vakoa k’i koup troi koté !

Justin / 27 mars 2010

Bann mové lang i di konmsa, in politisyin i nyabou di kékshoz avèk lo kontrèr, mèm manyèr, konmsi dann in ka konm dann l’ote sé sak zot i pans pou vréman. A romarké, la pa vré toultan, mé défoi lé vré... Moin lé sir zot l’apré domandé kossa moin l’apré pansé, kèl ka moin l’apré maziné. Déssèrtin mèm, daoir aprékalkilé Justin l’imazinasyon l’apré défalké.
Poitan, non ! Pars, moin l’apré mazine la taks karbone. Kan lo pti prézidan la déside mète sa an plas, li la amontr par "a+b", sa lété in bon z’afèr pou alé dann sans in léékonomi prop, avèk moins gaz karbonik dan l’èr. L’avé z’advèrsèr mé lo prézidan la fé fèrm z’ot boush an dé tan, troi mouvman... Astèr, lo prézidan i déside siprime lo famé taks la pankor apliké, vi k’lé karéman pa aplikab… é li la amontr par "a+b" té i falé mète in frin avèk sa, pars sosi, pars sola, patati, patata.
Rir lé bon ! Kass lé kui, ossi lé bon ! Mé noré poin in mové prézaz la-dan ? Noré poin in kou d’bate aryèr déssi la késtyonn lo réshofman klimatik ? Sré t’i pa ké lo prézidan i komans santi l’ay pou son zéléksyon an dé mil douz ? Mi koné pa si sé sa, mé si sé sa, lé ziska danzéré an avoir afèr demoun kom sa ! Si sé sa, nout politik pou protèz la tèr sré an danzé. Sa i aranz pa nou pars apré an avoir ponn dann nout ni, pran nout politik pou li, éstèr li anvoyré nout politik dann fon ranpar.
Mi éspèr, mi tronp, mé mon kamarad Zanbash-sak la pa invante zèf bouyi ! L’avé fine di amoin, prézidan-la, sa lé pa a fyé, pars son sèl traka sé rèss o pouvoir sinkan ankor. Pou li sa prézidan-la, sa lé kapab de tou… Kaziman, in fèy vakoi k’i koup troi koté !

Justin


Kanalreunion.com