Oté

Kèl Frans banna i vé mète dann Mayotte ?

Justin / 21 octob 2011

Moin la antann in konvèrsasyon dann radyo. In Maorèz té apré rakonté, èl i sort dann in gran vilaz i apèl Konmbani é èl i fé son z’étid isi La Rényon. D’apré sak èl i rakont dann téléfone, dan la zourné mèrkrodi, èl la sone son sèr lé la-ba dan son vilaz. Kan èl té apré téléfoné, èl té i antann in gran dézord, konm par égzanp bonb lakrimojène, sinonsa sak i apèl gonm-kogn apré pété partou. I paré la loi lété partou dan lo vilaz épi té i irl avèk demoun : « Rant dan zot kaz ! Fèrm zot porte épi zot fénète ! ». L’èr-la, èl la antann son momon apré di : « Alon rantré pou prépar la tonm »... In loi i di avèk li : « Prépar in bonpé pars nora bézoin ! ». Konm si in loi té otorizé pou fé ménas do mor konmsa.

Mèm zour, mé in ot l’èr, Elie Hoareau épi Gilles Leperlier i ariv Gillot. Zot i sort Mayotte pou di banna nout solidarité. Elie i di, li lé indigné par sak li la vi la-ba. Pou koué li di sa ? Pars mèrkrodi, na in Maoré la gingn la mor la-ba, é pou lo préfé l’androi, lo moun la gingn in kardyak. Biensir, kan ou lé préfé, kan ou sé in vaza, san fé l’atopsi, ou i koné do koué in moun i manifès lé mor. Solman Gilles Leperlier lété dan lo manifèstasyon é li la vi sé in bonb lakrimojène la tyé lo moun. In bonb tiré do pré, alé oir sa lé pa fé pou sa. Li lé fé pou dispèrs demoun é pa pou tyé.

Dann télé Mayotte Promyèr, in Maoré i déboutone son shomiz pou amontr in gran ron brilé la otèr son l’éstoma. Si sète-la té pa tiré bou portan, mi shanj mon nom. In sindikalis l’apré kozé, é li di konm de koi, li té i pans l’administrasyon la Frans té i aplik la loi fransèz é pa la loi la jungle. Astèr mi rapèl kozman Elie Hoareau té apré di : « Sa lé pa dign in péi konm la Frans ! ». Sanm pou moin, li na pliské rézon, sof ké nana la Frans bann droi de l’Om é la Frans bann torsyonèr. Kèl Frans banna i vé mète la-ba dann Mayotte ?

Justin


Kanalreunion.com