Oté

Kèl sé l’advèrsèr prinsipal é dsi kisa son fiziy lé braké ? In bon manir pou fé la par rant in vré épi in fo z’ami !

Justin / 27 désanm 2011

Matante Zélida la ékrir Justin :
Mon shèr nové, mon spès salté,
Astèr, mi pans ou i rann aou kont par ou-mèm sé lo komansmann la fin. Ou i oi pa kosa mi vé dir ? Ou i oi pa, sansa ou i fé sanblan ? Mi vé parl lo batay krab Sint-Sizane. So kou issi parti bann rouj-de-fon i pète an troi. D’apré sak mi sort antann nora troi list pou zéléksyon moi d’zanvyé. Lo pli rizib, sé ké lé troi té dakor pou sak té i fo fé pou la komine. Konm zot lé dakor, donk i fo zot i sépar, épi zot i prézant inn kont l’ot épi kont l’ot, dann ron batay kok. Ou sinonsa, shakinn nana son prop l’anbisyon, son prop shoviy gonflé, é i vé pa lès la plas son kamarad. Konm di in sèrtin Jack Chirak, in bann z’amiz dépi trant-an. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr,
Vi koné, nou n’oré préfèr l’inyon plito ké la divizyon. Normal vi k’linyon sé lo méyèr garanti pou gagné. Mé si i gingn pa fé l’inyon, mi pans pétète zot lé pa dakor rant zot pou vréman. Dakor dsi kosa ? Dabor inn, dakor dsi lo rézon lo pouvoir l’avé pou élimine Gironcèl : in vré rézon, sansa non ? Dakor dsi Io rol parti kominis : in rol diréksyon, sansa arienk in shifonn pyé, sansa marsh-pyé konm zot i vé. Dsi lo rol bann zournal la droit épi sak bann l’administrasyon i zoué ? Pétète galman dsi la natir lo pouvoir kolonyalis dan La Rényon ? Sa in bann késtyon inportan, donk in bann répons inportan é si bann répons la pa lo mèm, l’èr-la, i pé pa di, sé in l’akor pou vréman, in lakor parfé... Kozé lé bon, mé kan nana in batay, sanm pou moin i fo konète l’advèrsèr prinsipal é dsi kisa son fiziy lé braké. Mi pans sa in bon manir pou fé la par rant in vré épi in fo-zami. Késtyonn métod pou trap la vérité !

Justin

NB : Pou lo komansmann la fin, nou va oir lé shoz firamézir !


Kanalreunion.com