Oté

Késtyonn gouvèrnans, mi pans lé l’èr pou trouv in l’antant ! Plis ké l’èr solon moin

Justin / 5 out 2013

Na dé foi, dan la politik, ou i antann dé shoz épi ou i domann aou pou kosa lé sa i avans pa plis ké sa. Lé vré, moin la di moin mèm, somenn dèrnyèr, la vitès nana son tan, mé afors lé shoz i avans pa, i pé ète dékourajan. Kosa i pas dann mon tète kan mi anparl de sa ? Ma di in légzanp mé nana in bonpé shantyé lé posib rouvèr. Donk m’a anparl la gouvèrnans. Kèl gouvèrnans i fo pou La Rényon si ni vé nout péi i avans in pé pli vit épi in pé pli bien.

Nout uityèm kongré la donn son poinnnvizé : mi pans zot koné ali. Son baz, na in pèp rényoné, na in péi isi dann loséan Indien i apèl La Rényon, épi konm ni di souvan nout modèl la fine donn tout sak li pé, é i fo shanj modèl ; donk la gouvèrnans ké nout parti i souète sé donn lo pouvoir lé Rényoné pou pran désèrtin désizyon inportan é pou nou anbèk dann shomin nout dévlopman dirab. Mi sava pa pli loin, mé toulmoun i koné nout parti la ékri son shoi, noir par dsi blan. Konprann lé pa difisil é pou ète klèr na poin pli klèr.

Na dé-troi zané dsa, moin la parti la fète la salète Sin-Lé. Monségnèr Aubry la fé in gran prédikasyon épi li la abord la késtyon la politik. Moin té la, moin la bien ékouté, épi moin la di dann mon modékri sak moin téi anpans. D’apré sak moin la konpri té in apèl pou nou prann nout résponsabilité san an avoir la krintiv pou l’avnir sé kant mèm li k’i shant : "Oté kréol, pa bézoin toué la pèr, lèv la tèt…". Lo tan la pasé, mi pans pa ziska zordi bann politik La Rényon la tir lo bann loson téi falé tiré. Mi trouv lé bien domaz, mé konm di lo kont la pa bézoin rogrété sak ou la pankor fé sirtou si lé pa tro tar é mi pans lé pa tro tar.

Na dé-troi zour lo dépité-mèr Sin-Lé, i di dsi Barachoi, dsi la késtyonn Rsta, sa sé in n’afèr i intérès tout Rényoné, sirtou bann politik. Aprésa li di, sa lé konm la gouvèrnans, sa in n’afèr i konsèrn nout tout, é solon li demoun i bouj pa. Lé vré, na d’ot manyèr fé avans in késtyon ké fé lo kriyèr d’nuit dann radyo sansa dann télé. Si ou lé sèryé, si ou lé sinsèr, na d’ot moiyin pou fé avans lé shoz... Moin na in dalon kasèr lé kui, i di konmsa, mé, mi pans sé in fasonn farsé, vik toulmoun lé dakor, i trouv pa in lantant. Poitan lé l’èr pou trouv in l’antant... Mi pans lé l’èr pou vréman. 

 Justin 

NB : Na mèm in rovi la mète dann son ine kouvèrtir : "Didier robert, l’autonomiste". Sé dir azot !


Kanalreunion.com