Oté

Késtyonn tram-trin :
 ... in bon zouèr nana touzour in kou d’avans !


Justin / 3 désanm 2009

Matante Zélida la ékrir Justin :
 

Mon shèr nové, mon spès salté ! Zot, bann rouz-de-fon, koman zot nana l’orgèy don ? I diré zot i vé pran la plas gouvèrnman. In ministrèz la Frans i vyin issi, i fé son sézour, épi i di k’i fo pa konte déssi lo l’Éta pou mète in l’éro an plis déssi tram-trin. Sa in n’afèr la di ! Alor pou kossa zot i sava rode midi-a-katorzèr ? Pou kossa i fé in l’asanblé plényèr. Dizon pou drèss zargo kont gouvèrnman la Frans ! Pou ète fourné, zot lé fourné ! La zok azot konmsa, épi zot i kontinyé fé lo rodomon ? La onte, koshon la manzé, i fo kroir ! Pran sa pou toi !
 


Justin la fé pou répons :

Mon vyé matant k’i koz touzour la boush rouvèr, na dé foi la rou i tourn san k’i an apèrsoi. Lé vré, ministrèz l’outre-mèr la vni fé in vizite. Lé vré k’èl la fé in déklarasyon pou mète nout tram-trin an danzé… mé dé k’èl la vir lo do, promyé minis an pèrsone la donn la démanti : la di, gouvèrnman i marsh la min dan la min avèk la Réjyon dann dossyé tram-trin... Pou anshèv dépal bann l’iltra-Droite, té i kont la-dsi pou mète l’Alyans dann malizé, la anvoy son lète lindi dan la nuite pou landomin mardi. Kan in pé lété apré fé lo fyèr, baton laté fine shanj de boute... Matant, ou i koné lo zé l’éshèk ou ? Nana bon zouèr é nana sak lé mové. Lo bon zouèr-la, li nana touzour in kou d’avans. Obli pa ! 


Justin


Lésplikasyon inn-dé pti mo :

Drèss zargo : konm kok kan i ménas son ladvèrsèr

Fourné : nana toupé

La zoké : la mète in zok dan la tète

Fé lo rodomon : fé lo robèl

La ont, koshon la manzé : na pi l’amour prop


Kanalreunion.com