Oté

Ki di fo késtyon, i di ossi fo répons !

Justin / 29 mars 2011

Dézyèm tour zéléksyon kantonal lé fini. la droite dir la gingn in kou d’rès trankil. Pars si i fé lo total i apèrsoi èl nana zordi sèz konséyé zénéral. Avan, èl l’avé disnèf. Sak lé kont la droite dir, l’avé vinn-nèf konséyé. Astèr èl nana trann-troi. Bann zéléktèr la fine fé zot shoi, épi zot shoi lé klèr.

Astèr, konm di lo kont, troizyèm tour i vien. L’èr-la, i fo fé in nouvo biro, mète anlèr in nouvo prézidan, in nouvo komissyon pèrmanant. In désizyon k’i kont mé pa solman sa ! Pou kossa ? Pars sé lo moman pou fé in nouvo lantant é pou oir kossa i fé pou vréman dépi 2011 ziska 2014. Pars apré 2014, lo tik-tak i doi shanjé, konm pa.

In nouvo lantant, sé in nouvo program, pétète pli klèr pou l’moun, pétète pli sosyal, sirman myé kakilé pou ède anou rézoud nout bann gran problèm konm shomaj, la mizèr noir, l’ède bann moun frajil. I mankré pi ké bann konséyé zénéral i déside arienk shanjé sansa gard in diréksyon. Si sé sa demoun lé riskab ète pliské dépité, é moins voté si lokazyon i arprézant.

Dizon lo travay i komans vréman. I fo poz bann bon késtyon pou an avoir lo bon répons. I ansèrv de rien, sote déssi son shèz konm in kabri an kriyan : "La gosh !La gosh ! La gosh !", ou sansa : "La droite ! la droite ! La droite !" Pars in fo késtyon, i amène forséman in fo répons.

Justin


Kanalreunion.com