Oté

Ki la di a zot Brézil i sar gagné ? Zot lé sur ? a moin pa tro !

Justin / 10 zwiyé 2014

Si zot la u la posibilité ogard lo matsh Brézil-Almagn ier soir, ou so matin gran matin (ék dékalaz orèr), zot la du antann bann kronikèr sportif dir i ta d bétiz avan lo matsh !Inkroyab ! Ou pé avoir inn préférans, in soué, inn espérans ; mi di pa ou na pa lo droi éksprime a ou si sak ou voudré, ou préfèrerè ki gagn ; mé de la, asuré, insisté, an tan ke zournalis, mi estim ou devré avoir inn atitud plito neutr, ou na poin po donn analiz orianté !
Or ier, i parl riink Brézil, Brézil, Brézil ; i fé koz zouèr da Silva, lo kapitèn suspandu ; bann zouèr i armontr ankor la foto ék lo non Neymar, lot zouèr atakan ke té zoué pa ; pokoué tout so propagann si in sél koté ?

Pandan so tan, i domann pa ariin Klauze, Muller, ou Lam, anfin bann zouèr alman ; konm si zot té i égzist minm pa !
Zournalis i vé fé pansh lopinion lo monn antié ke sé le Brézil touzour pli for, touzour gagnan, la védèt dé védèt an foutbol.
Oté, mé nou ke nou lavé vu koman lalmagn la bat la Frans 1-0 (o bou de 10 minut) é ke malgré no Karim Benzema, Mathieu Valbuena, Patrice Evra, la Frans la pa giny mét in balon dann filé zalman ; nou lavé vu koman so lékip té i démerd bien !
Koman nou té pé aksèp sa ?
Zournalis lé pa objektif !

La Zournalis Brézilièn té ankor pli réalis ke lo bann kamantatèr fransé !
Lamantab ; moin la ont in shén télé publik i pran parti po in koté plito ke lot !
Koué na ladsou ? Mi espèr la poin ankor podvin, dosout tab ; koripsion !
Moin lé a damandé si i péy pa zot po zot anons in koulèr plito kin not !
Aprè, kél désépsion ! Évidaman, ou la fine prépar tout do moun : « Braziou i giny ! »
1-0 ; 2-0 ; 3-0 ; 4-0 ; 5-0 ; 6-0 ; 7-0 ; in moman ou noré pu kroir in matsh andbal (ék Richardson) !
Ankor éré la giny mark inn ti bu dernièr minut po sov lonèr, sinon, gouté zot té i giny pa !
Ki la di a zot Brézil té sar gagné ? Zot lé sur ? A moin pa tro !

Justin


Kanalreunion.com