Oté

Kiba : La bann i ramas mantèr la pa ditou lo koté k’in pé i kroi !

Justin / 3 octob 2016

Kan i parl Kiba, la plipar d’tan i vé dir sa in diktatir é dann péi-la sé lo parti kominis k’i aplik son diktatir dsi la popilasyon. In l’égzanp ? I di toultan dann zoinal la droit tout bann z’éli sé lo parti kominis k’i non mazot avèlk anplis la réprésyon, la frode, la zol pou bann soutérin l’opozisyon.

Poitan d’apré sak Salim Lamrani i rakont la pa konmsa ditou. An kontrèr Salim i rakont lo bann kandida lé shoizi par bann komité popilèr an parmi bann kandida lo pli onète, lo pli konpétan é bann z’éléktèr, pou dé sèrtin z’éléksyon na lo droi po voté l’èr lo moun i gingn z’ot sézan.

Sé pou sa ké la moityé bann z’éli i fé pa parti la parti kominis kibin. Zot va dir amoin lo boug i manti ? Mé li la fine ékri in bonpé é liv, é li la fine done la parol bann gran pèrsonalité lo réjime kibin, konm d’ot moun-z’ékrivin, intéléktyèl é d’ot ankor-si tèlman ké Salim Lamrani i site mèm inn dé rapor bann z’ong – konm Greenpeace-k’i di ké Kiba sé lo péi i réspèk lo pli myé lo droi demoun dann l’Amérik - Kaziman dopi lo pol nor ziska lo pol sid, dopi lo Canada ziska l’Arzantine.

Donk, d’apré sak mi konpran sé plito bann gran zournal épi la diplomasi bann gran péi réaksyonèr k’i pass z’ot tan pou ramas mantèr dsi pti péi-la. Donk la bann i ramas mantèr la pa ditou lo koté in péi fé kroir.


Kanalreunion.com