Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Kisa d’antré nou i pé prévoir nout domin ? Vré dovinèr lé rar konm korn lapin

mèrkrodi 29 zwin 2016, sanm Justin

Matant Zélida la ékrir justin :

Mon shèr nové, mon spès salté, rouj-de-fon dovan l’étèrnité, mi pé dir aou moin lé kontan. Pou kosa moin lé kontan ? Pars Sarkozy i rovien. Sondaz i done ali gagnan kont n’inport ékèl kandida. In moun konm Holland li bate sa par faks. D’ayèr son prop z’ami la pa di, mète in shèv kont Hollande li lé sir d’gagné. Lé vré ké nana ankor in pé d’tan pou pasyanté, mé si la pasyans lé rékonpansé, ala in bon pasyans. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, mi koné pa kosa i fo dir aou moin. Pars oplis lo tan i pass oplis mi oi pa kosa so zéléksyon i pé aport anou. Moin lé a d’mandé si, dann tout sète afèr, i fo pa solman élimine lo pli mové si i gingn. Lo pli mové sé ki ? Kan ou i koné ké près tout-gosh konm droit - i vé pa vréman shanj lé shoz isi La Rényon, i vé ké lo sistèm néo-kolonyal i kontinyé pou fèr anou d’tor é ranpli lo pla bann gran sosyété, épi anpèsh anou trap nout dévlopman dirab... Mi diré, zordi, sanm pou moin, tout lé mové mé pé s’fèr ni apèrsoi kan i ariv lo votaz nan lé pli mové ké mové é sètla i fo bar son shomin.

An touléka pou out prévizyon, la pa bézoin alé tro vit pars i pé ariv dé shoz pèrsone la pa prévi é i pé z’ète konm in siklone dann lo syèl La Rényon. Kosa par ébzanp ? Mi koné pa o zis, mé mi di k’i pé avoir. Kisa d’antré nou i pé prévoir nout domin ? Sharjèr d’lo nana mé vré dévinèr lé rar konm korn lapin. Tok ! Pran sa pou ou !


Inn modékri, inn ti lavi, inn komantèr ?

signaler contenu


Facebook Twitter Linkedin Google plus