Oté

Kisa i lé lo bann bézèr d’paké !

Justin / 17 mars 2016

Mi koné pa kèl moush la pik a èl, ni pé dor trankil, i pé pa èt zika vik pou lèr nou la pwin isi. I prétan dir madamm la prézidant té mwin sink maté mardi, mank in pé té pé fout in gomaz èk son bann ladministratif dann lasanblé. I prétan èl la gonf in pé kont banna d’si lo rol shakinn néna dann la koléktivité. Lé vré, lo ladministratif néna son rol é lo zéli néna son syinn, inn i désid é lot i égzékit. Di mwin sé konm sa lo rol.

Konm mwin la konpri soré plito lo kontrèr ki éspass. Kisa i rokrit o ziss ? Sanm pou mwin ziska zordi sé bann zéli. Souvan-dé-fwa i rokrit la minm dann lantouraz, san sousié, kan lé pa dann la famyi i konsidèr, an rokonésans pou sak la mié sérvi, pou sak i manié mié la kol pli vitman. Aprésa ni pé konprann, la difisilité donn lé zord. Zot i koné konman i lé, i donn in pié, épisa i pran in karo. Aprésa néna sak lé kalif la plass lo kalif.

Mandoné, si néna in lérèr, konm ni pé war tanzaot, tousala i pé port prézidiss bann zéli vik pli pérsonn i pran pi lèr èk zot. Sépousa, mardi, madamm la prézidant la di konm sa “Boudikont zordi, i pran bann zéli pou bann bézèr-d-paké“. Mi sort war dann diksyonèr semi-lo-mo Danyèl Honoré, kosa i vé dir in bézèr-d-paké ? Pou li i vé dir, in moun filou, donn a li zamé out konfians. Donkalor ?


Kanalreunion.com