Oté

Kisa i pèy lo po kasé la-dan ? Toultan lo mèm ! Toultan bann ti kolon !

Justin / 15 décembre 2012

Na dé foi moin lé a dmandé kansa so bann tournèr d’fime va fini par arèt in pé, pars afors zoué èk do fé, in pé va fini par bril zot doi. Pou kosa mi di sa ? Pars dopi in bon koup de tan, demoun i fé maniféstasion. I bar la rout, i dépoz mosion dan la préféktir, i rant dan Pol anploi, i sava la Réjion, i kri dovan Konsèy zénéral. Pou kosa ? Pars zot i prétan, la promèt azot bann ti kontra épi zot i oi pa arien arivé.

Pli pir, kan lo moun l’apré vanjé i ésèy konprann pou kosa zot lé dann tablatir, la pa moiyin pou zot avoir in z’éplikasion k’i konvien. Touléka, in z’ésplikasion asé klèr pou in moun normal konprann. Alé oir, tout z’afèr i vien si tèlman konpliké ké lé pa posib oir in pé klèr la dan. In l’égzanp ? Kisa la vréman konpri la késtionn l’ARAST ? Mi pans pa nana in bonpé d’moun La Rényon la konpri in n’afèr konm sa. In pé la di sa ! In pé la di la ! La ral pousé, la pous ralé, gasparin briné, pou fini an lo d’boudin. Dopi in sèrtin tan, na la késtion bann z’anploi vèr : nana 942 lé riskab èt o tapi d’isi moi d’févrié. La négosié moi d’out, la di la trouv in z’akor an katrièm vitès, épi, mank de po, moi d’désanm, lo bann z’otorité i di na poin l’arzan pou ronouvèl bann kontra. Biensir, zot i di zot lé dézolé, mé avèk zot dézolasion i sava pa bazar ! Mi sort antann Monique Orphé dann télé apré di, la komine Sin-Dni i fé l’éfor ki fo pou bann krèsh, mé Konsèy zénéral i fé pa.

Soi na poin pèrsone pou ésplik sak i éspas dann désèrtin ka. Soi lo bann résponsab zot mèm i konpran pa sak i éspas. Soi zot i s’anfoutsa. Amoin ké lé z’inn konm lé zot i désid kamouf la vérité. Amoin ké zot sèl éstratézi, sé pou mèt l’otèr dsi d’ot é protèz azot avèk in gran parasol. Konm sa, zot i pans, nora poin konsékans pou zot. Mé pandann tan-la, kisa i pèy lo po kasé ? Toultan lo mèm.

Toultan bann ti kolon.

Justin 


Kanalreunion.com