Oté

Kisa i sava pran ? In moun isi, sansa in moun la-ba pou diriz l’opital ?

Justin / 29 avril 2016

Si zot la suiv in pé lo l’aktyalité, zot la sirman antann parl i doi nome in moun pou diriz in gran l’opital : lo CHU, si mi tronp pa. Konm d’abitid, na in moun d’isi La Rényon épi in moun dé la-ba La Frans. Konm moin la antandi lé dé na lo mèm diplôme : i di lo mèm konpétans ! Donk inn é l’ot i pé okip lo post.

Alon artourn an aryèr : zot i souvien kan l’o l’ansien prézidan Sarkozy la fé in konférans dsi lo z’éta zénéro, moi d’novanm 2009. Moin pèrsonèl, moin la touzour pansé zour-la li la pa koz arienk pou bate la lang, mé li l’a di dé shoz sèryé. Pason la dsi, mé li l’a di in n’afèr : li la di rant dé pèrsone mèm konpétans i fo donn la proférans lo kandida lo péi. Donk, dann lo ka k’i intérès anou, i fo nonm lo kandida la Rényon, si i mérit ali.

Lé bien rogrétan ké sé in moun la droit la di sa é k ‘in moun la gosh sa sé pa son krédo an zénéral : rapèl azot lo madam Lodou ! Rapèl azot l’anbasadèr la Coi zordi ! Alon pa obliyé kant mèm lo nouvo réktèr sé in rényoné, mésyé Marimoutou. Dan lo ka k’i okip anou, i paré nana si tèlman dézord dann park kanar ké sé lo Prézidan i sava shoizi. Si lé vré, lé for in n’afèr konmsa !

NB-In késtyon kant mèm : si ni vé komans dénéo-koloniz in pé nout péi sé lo rényoné k’i fo shoizi... Apré sa lo match sar pa zoué pars dé néo-koloniz La Rényon sé in gran l’antropriz po nou, la pa sa solman va done in vré dépar. Mé si i nonm lo moun déor, lé sir, sar in gran pa an aryèr. Hollande, tasyon out plime i trok !



Inn modékri, inn ti lavi, inn komantèr ?



Bann modékri andann forom






  • Mwin mi di sek va défand lo plis t zintéré la Rényion, dann lopital, dann ministér dwa ète sélèksyioné !
    in direkter lopital i doi tyenbo , dobout ansamb meme si an fasse tout’ la korporatyion i oi ké zot intéré, paské pafoi lo malad i koné pi oussa tourn la téte pou fé komprand son malérésort, sa osi i fo pa nou oubli, é nou défand solman in sèl zafèr !
    si lo bononme dan son zojektif i plass lo malad o ker dson program é défand lo moiien pou arivé ,là lé in bon sine. humanize lopital nou la bezoin, mé mi zénéraliz pa kan midisa , é mersi toutedomoun k’i soi dann lopital, k’ i soi uzazé i oi komsa lo problèm.

    Article
    Inn modékri, inn ti lavi, inn komantèr ?


Kanalreunion.com