Oté

Kisa la pran lo graton parlfèt ?

Justin / 20 out 2015

Dopi mardi lékol la rouvèr. Bann marmay la rotrouv zot bann kamarad é la lé roparti pou in nan. Sé la rantré pou marmay konm pou lo lamontrèr é lo lamontrèz. Mandoné ni pé domann a nou minm poukoué alé ankor lékol zordi ? Vik sé in lisinn pou fabrik shomèr, tou lé zan néna o mwin 10000 i sort lékol é andan la konbyin i travay ? Ti lékol, gran lékol, lisé, linivèrsité souvan-dé fwa néna èk gro-gro diplonm minm mé boudikont, travay oki bourik. Sèt ané inn dépité la rényon i di “la rantré di shanzman“. Kèl èr ? Na war.

Ni atann pou war, byinto i riskab èt osi la rantré pou bann politik. Néna gro grin pou moud, vik fin d’lané néna zéléksyon la rézyon, étonn pa nou si i tard pa pou larg la sos. Kandida pou lèr i mank pa. Mi argard in pé la météo politik, sé dérnyé tan, lé éspésialis i anons a nou tangaz disi pa tro lotan, i prétan in gro niaz i tourn si nout tèt, pétèt i tard pa pou pèt konm loraz. Sépousa désertin i profèr atann pou war. I prétan lo tan sar télman mové ké sar oblizé fèrm la rout pou in koup do tan.

An parlan d’rout, mi antan i di konm sa, mi vann konm mwin la ashté san fé bénéfis, mi antan i di konm sa, kan la désid donn lo lantropiz pou fé lo shantié d’la nouvèl rout di litoral i di néna inn ou dé la gingn in graton é i prétan sé pa inn ti mizign graton sé in gro-gro graton. Zot i koné kan i tié in koshon, tout la famyi lé an parmi, pou partaz graton, tout té au kouran sak la angrèss lo koshon, sak la tié lo koshon, sak la partaz lo graton sak la pran lo graton. Kisa la pran lo graton parlfèt ?


Kanalreunion.com