Oté

Kisa lé parès la ?

Justin / 6 octob 2014

Mi koné pa si zot la vi, konm moin, lo takonn moun la vni rode travay Sin-dni. I paré l’avé plis mil pèrsone l’avé réponn l’of travay polanploi, pou la komine Sin-dni. Demoun lété foulé vèy pa koman, épi zot la atann plis katrèr pou sèy gingn in pti boulo... Pars gouvèrnman la trouv arienk sa pou ofèr bann shomèr La Rényon, é ou i vé ou i vé pa, ou lé blijé d’alé rodé. Pa po gingn in bon moné, mé pou sèy gingn in pti moné… An éspéran, pyé doné shoval monté, ou va gingn o firamézir gonf in pé out pla, fé pass aou pou in moun i vo la pène é avèk in pé d’shans gingn in bon travay a suiv. Ou i oi in pé si bondyé i désid in kou piss dsi out tèt ?

Dann tousa dmoun l’avé in pé tout kalité : bann bak plus, bann bak moins, bann marmay gabyé, bann marmay démèrdar. M’a dir azot, fransh vérité, moin noré zamé pansé la zénès nout péi dann in tablatir konmsa. Moin la rèv mon péi dévlopé ! moin la rèv mon péi sové ! Moin la rèv mon péi béni par la min Bondyé ! Poitan, la pa lo ka : travayèr bon pé, travay tré pé. Travayèr ? Ou la di travayèr ? Mé na bonpé d’moun i pans pa konm ou é kan ou i antann désèrtin apré galvode nout zénès, apré di na arienk bann finyan ! Aprédi na arienk moun i rode larzan, i rode pa travay. Kèl maléré sor antann in n’afèr konmsa ! Kèl maléré sor antann désèrtin apré kritik nout zénès.

Poitan si tout demoun lété vréman finyan, si tout demoun té i rèv in métyé i sali pa, i transpir pa, avèk in larzan k’i tonm pil la fin di moi, dor dsou pyédboi an atandan solèy i kapot dann l’ot sans noré poin in kantité dmoun pou vni rod in travay kontra, in kantité dmoun pou préfèr l’onm plito k’ lo solèy. Pou déklar, konm di lo kont « Lo ropo avèk la bone nouritir la zamé tyé pèrsone ! »... Poitan zot lé la ! Poitan zot lé an kantité ! Poitan sé l’anvi travay la fé mète azot in pyé dovan l’ot pou ariv l’androi zot i lé. Sèryé, di amoin in pé kisa lé parès rant bann moun-la ? Kisa lé parès la ?

NB


in mo po la rout : "travay la klé !"… Travay la klé, sé rant dann travay pou fé kékshoz, épizapré, amas out moné épi artourn out kaz… La klé i pèy toutsuit. Pou kosa i apèl sa « la klé » ? I di osi « békèr d’klé ! » sansa « bèk in klé ! ». Lo mo klé, nana d’ot sans ankor. Azot fé travay zot koko ! Azot fé boui zot matyèr griz ! Pou trouv sak i pé trouvé ! Alé ni rotrouv.


Kanalreunion.com