Oté

Kissa i pé an avoir lo droi d’mor déssi in moun ? Moin pèrsonèl, mi oi pa !

Justin / 27 out 2009

Matant Zélida la ékrir Justin :

Mon shèr nové, mon spès monstré,
Pou l’kou, moin lé blijé d’dir, madam-la i fé pityé pou vréman. Ala k’son mari la ésèy tyé aèl, la pa nyabou, mé la tyé son zanfan. In boug konmsa, si li lété pa mor, li nora byin mérité k’i koup son kou. Mé oila, li lé mor ! Dézord dann ménaz, sa i ariv, i ariv mèm souvan, mé krime konmsa lé plito rar. Mé kant mèm, ou na gran zanfan, akoz ou i kite out mari… sirtou kan zot dé lé ansanm dépi in bon koup de tan. Lo prèt la pourtan di, k’i maryé pou lo méyèr é pou lo pir. Lé vré ! Zot, bann rouj-de-fon, lo prète la pa z’ot dalon. Di pa moin non !

Justin la fé pou répons :

Mon vyé matant k’i pé pa s’an pass koz la boush rouvèr,
Pardon, éskiz, mé si moin la byin konpri aou, so krime-la i rovyin in pé par la fote lo madame ! Ou i voudré, an plis son malèr, èl i ral déyèr èl ,konm kondané té i ral la shène, in santiman kilpabilité. Mé, matante, avan ziz in moun, i fodré byin konète sa vi. Mé, mèm sa, i sifi pa, pars nou sé nou, é èl sé èl, é ni koné pa par ousa èl té fine passé, ni koman èl té i porte so sharj-la dann son tète épi dann son kèr. Mi konstate solman, nana tro d’madam, épi tro d’zanfan i gingn la mor san rézon, avèk in boug i done ali in droi pèrsone na poin déssi la tèr. Kissa i pé an avoir lo droi siprime la vi d’in moun ? Moin pèrsonèl, mi oi pa !


Kanalreunion.com