Oté

Kod é statu sosio (i sort lo mo sosiété) !

Justin / 20 mars 2014

Nou lé réglé ék kod antro nou, sank nou kalkil sak instan sé koué ; nou lé réji par sa, ke nou vé ou ke nou vé pa ; sé konm sak sa i fonksyone konm ki diré ; lo kod sé po, an kèlke sort, mèt a nou an akor ék sak la sosiété i vé ; lo statu li, sé konm in bann rég présk inpozé po sak persone dan tèl ou tèl sitiasyon. Bon ! Kan moin la fine ékri sa, i fok mi éksplik in pé mon propo, bayoun ; sinon, zot va di : bin la koué lo justin lapré ankor rakonté ?!

Lot zour dan in fèt an plin èr, té i fé so an plis, inn ti group, gitar, kaïanm, roulèr i mèt in maloya po in bann marmay i prépar in voyaz an Frans ; a moin éspéktatèr, moin la pa giny ténir, moin la lévé, tir mon soulié, artrous mon pantalon, dépoz mon kabay, fé roul a li konm moin la anvi, lo ritm té tro for…
Akoz lé zot la ress asiz, gindé dan zot soulié ék sokèt ? Pourtan nout tout, nou té a tèr si zerb sèk laprèmidi ? Ko sa té i anpès lé zot lévé ,dansé… ?
Na in kod la : nou lé éspéktatèr asi, nou lé pa dansèr ?
Mon statu sé : moin lé la po rogardé, pa po mayé ék mizisiin ; mi fé pa lo éspéktak !

Kan bann misionèr lariv an Polinézi, zot la vouli sanz lo bann kod laba !
Avan, tout taisyéne té i mars partou, té i dans, tété déor ! Bann prèt la la di a zot : « sa sé in pésé, sé inn ofans a dié ! » oui kalkil !
An Nouvèl-kalédoni, na minm in koup rob i kouv lo kor la fame dépi lo poigné zisko kou, i ardsann zisko soviy ! I apèl sa rob mision.
Poko sa sanz zot kod ?
Si mon statu sé èt kanak, lès a moin viv ék mon kod kanak !
Mi viv dan in sosiété kanak ék mon bann kod ; lès a moin dan mon statut Kanak !

 Justin 


Kanalreunion.com