Oté

Koman dan la vi in nafèr i antrèn lot

Justin / 26 novembre 2013

Moin tapré fé in réfléksyon koman in zanfan i amèn son paran fé sèrtin zafèr.

Otroman di, in nafèr pétèt a ou gran moun ou noré zamé fé, mé a koz out zanfan ou fé po li, ti vé, ti vé pa, sinon sa, mèm dousman, out marmay là i ral a ou… bon mi pans plito bon zafèr, mé nou pé pran dé-troi égzanp po byin éksplik sak mi vé rakonté !

Out marmay fine giny 14-15 zan, li sort lékol, lo swar li ariv li di a toué : « Papa, monmon, moin la bézoin in mont po moin war lèr kan mi fé mon devoir dan la klas ! ». Toué, ti grat la tèr, ti koup kann, ti baz si solèy, toué la zamé avoir bézoin in mont si ton bra ! Koué ti fé, si na lé moyin, lo mont là i fo ti sar asté, oui, non ?

Marmay i di a toué li vé aprann la mizik, kalkil tout sak i antrèn, kèl zinstriman, kour partikilyé, konsèrvatoir ? Talèr son bann zétid kab amèn a li (a ou avèk) ou sa, ziska dan kèl péi ?

Mèm a ou, ti ariv pi dan lagrikiltir, ti vé travay mason… a ou rod zouti, matéryèl, inn po amontr a ou, komans manèv, là si fo alé an déplasman, blizé rod in vélo, in moto, i arèt pa, in nafèr i antrèn lot…

Mi koné moun la fé bonpé zanfan… ladan, pa tout la mars droit ! Na in pé pa giny aprann lékol, la révolté kont lotorité lo bann mèt, lo paran, lo zinstitisyon, la loi… sa la pa pèr larmé, lo boug (ou lo fanm) malérèzman i trèn par si par la, talèr li la fine ni volèr, bagarèr, vagabon, pli grav, kab tyé domoun : là, la pa bon di tou po lo bann papa, monmon, ki noré di son propr zanfan noré antrèn a li ziska là !

Dan la vi, in nafèr i antrèn lot !

Justin


Kanalreunion.com