Oté

Koman oui vé léléktèr lé pa in pé perdu ?

Témoignages.re / 1 mars 2014

Normalman lé déba télévizé lé fé po ékléré lé zéléktèr, sirtou sak i koné pa lir, ou na dé zésanz an parol, toutmoun i giny konprann é fé inn idé lo programe lé zin é lé zot !
O plis mi rogard é mi ékout o plis mi mélanz tout ; si avan moin té koné pa po ki mi sar voté ; bin, sé pa aprè lo déba, mi sar plis avansé !
Ninport kèl vil ! Pran sak ou vé ! sirtou an zénéral, lo mèr an plas li na tout dosié po argimanté, li défann biin son komine ; mé baya, bann nouvo salinzèr, lèv gran matin po ou konprann !

Largiman dir lo mèr an plas la pa fé asé ; ou la fé konmsa noré di fé konm si, lé in pé fasil !
I di a toué na pi larzan, ou ti vé alé ?
Si ti pran la plas lo mèr ta fèr mié ?Ki i di ou va fèr mié ?
Mi trouv tou sé bann kandida i dévré èt in pé pli modès ; promèt pa tro la line é lé zétoil !
An plis moin lé pa rasis, parfoi moin lé a domandé si lo sèl « sipériorité »ou la sèl « diférans » ant tél ou tèl sé pa riin kin nafèr d ras, de kominoté, lo réflèx kominotèr konm i di !

Mi vot po mo ko- rolizionèr…ou mon klas sosial.
Moin lé intéléktièl mi vot po in nintéléktièl ! Moin lé in fonsyonèr mi vot po in fonksionèr ; so matin moin la minm antandi in oditèr di : tèl mèr la fé zétid sians li pé pa diriz in komine ; li vé in boug(ou inn fame) la fé lo droi ! Ou zétid politik !!
E bin ou sa do moun i sar sort so bann zargiman ?
Rézman nad soi biin ékspliké ; konm so mèr i di ant fonksioneman(anploy bon pé personèl), li-ék son konsey minisipal- li la soizi investisman ; asèt térin, konstrui zimèb, lozman sosio, po tous dan lavnir taks, zinpo ;15 zan,vintan, po lavnir son bann konpatriot, oué fo osi pans lavnir nout zanfan,zévérasyon fitir !Sa sé in bon zargiman.
Konm sa léléktèr lé moin perdu !

 Justin 


Kanalreunion.com