Oté

Kome i di : la lang é la kultur kréol rényonèz la pa fé pou l’shien !

Justin / 16 out 2016

Domin sé la rantré l’ékol é konm shak ané nana touzour in bann késtyon k’i rovien alé oir ou i pans sa sé dé problèm réglé é arshi-réglé, mé ou i apèrsoi ké non. Ou i apèrsoi, nana lo diskour ofisyèl, sak ou i antann dan la boush bann moun otorizé sansa sak ou i pé lir dann bann tèks ofisyèl épi nana lé z’ot diskour k’i vien pou polué lo diskour ofisyèl.

Nana biensir la késtyon l’ané éskolèr, nana la késtyon bann program, épi konm touzour nana la késtyonn l’ansègnman biling donk koman ansèrv osi lo kréol rényoné dann in bon l’édikasyon nasyonal. Lé vré sa i poz problèm é pa arienk dopi yèr, ou dopi avan-yèr. In amontrèr la di amoin, souvan dé foi son pti pé d’san i bouy. Pou kosa ? Pars solon li lo kréol rényoné nana in sanblan lo rokonésans, mé dann la réalité i trète pa li konm in lang a par antyèr - mé plito konm in lang antyèrman a par !

Poitan, zot i koné lo kréol rényoné lé rokoni konm in lang ofisyèl pou la Répiblik, konm lo Kors, lo Bréton, la lang d’Oc épi in gran kantité la lang ankor. Donk i fo donn ali son plas dann la Répiblik, é i pé donn ali son plas dann l’édikasyon la Répiblik ! I fo konsidèr ali konm in bon z’outiy pou aprann in bonpé la konésans, konm pou rouvèr nout l’éspri dsi la kultur rényonèz é pétète plis ankor. Sa in n’afèr sinp ké mi di la !

Alé oir zanbèk i mank pa, é bann z’anbèk pozé par l’édikasyon nasyonal èl mèm é par tout inn bann lé pa réspèktyé pou nout lang é pou nout kultur sa sé in n’afèr k’i plé pa nou ditou. Fransé, ni réspèkt aou ! Kiltir fransèz ni ador aou ! Mé ni doi dir la lang é la kiltir rényonèz, sa lé pa fé pou l’ shien !


Kanalreunion.com