Oté

Kome in tapi mandian mal antrotoni

Justin / 30 out 2010

Saint-André, dimansh matin, la plas la méri lé ranpli avèk demoun in pé toute kartyé. Zot la vni pou partisipe l’asanblé popilèr pou konbate la mizèr. L’Alyans kont la povreté la domann tousa d’moun pou vni tèr-la. In l’asanblé pa konm toute lé zot, vi k’bann viktime épi zot l’assosyasion i pran la parol pou dénons in politik i mète plizanpli d’moun dann malizé.
Na in dalone i pran la parol pou di konm de koi, solon èl, kan lo moun i apovri épi i afayi, sé la sosyété èl mèm ké lé riskab dézartikilé ; I komans par lo bann pli fèb, sak lé dann bor, sak lé dessou lo sèy povrété, sak lé vyé épi sak lé malade ; é bann marmay la défans lé fèb. Pizapré, i atak bann sèrkle demoun nana in pti moné, i gingn zot soso a pépré konm k’i fo, ziska k’in zour la malédiksyon i tonm déssi zot tète, avèk son konvoi d’dézagréman. Aprésa, sé bann klass moiyène k’i pran lo shok zot tour. Pou finir, lo santr li mèm lé ataké ; É la sosyété i kass par boute, i fonn konm in kaz karya la manzé, konm in tapi mandian* mal antrotoni.

Justin

*Brigitte Malet va éskiz amoin an avoir prète èk èl son parabol "di tapi mandian". Sa i défile par le bor, pizapré par bann ran anndan, épi i atak lo milyé, ousa landroi lé gayar mèm, èk in zoli motif é-tou, é-tou. I fo rann Sézar sak i apartyin Oguiss, é rann Brigitte sak i apartyin a èl.


Kanalreunion.com