Oté

Konbien i sar rète ankor dan la kivète la ? In ta èk in paké bien sir !

Justin / 15 désanm 2014

Sa lé sir, si lé shoz i kontinyé konmsa ni sava bate nout tèt dann mir. Sar in kriz an zénéral ! Si i trouv pa in bon solisyon, pa in solisyon avèk la boush mé in solisyon pou do vré, é bin, mi pé asir azot nou lé pliské mal parti.

Pou kosa mi di sa ? Pars lé bien posib l’ané 2017 sar la fin nout kota d’sik, sar la fin galman nout pri garanti. Lé vré la kriz, sa sé in n’afèr ni koné. Dann nout listoir nou la koni in bonpé kalité : la kriz kafé li, la kriz kan la aboli lésklavaz li, la kriz la guèr li, la kriz jèrniome… Boudikont nout listoir sé in kriz pèrmanant, avèk tazantan in l’anbéli. Pou anshévé ala ké nou lé dann in kriz nou la pa rodé. L’èr-la, la kriz k’i vien i sar ète dir é pliské sa !

Pou kosa ? Dabor pars lo nouvo kriz i bransh avèk in sitaysionn kriz déza bien for. Dézyèm zafèr I sava mète dann malizé in gran kantité d’moun. Bann planter kann, é ki di planter I di osi in kantité l’antropriz agrikol, avèk zot bann travayèr. Armète èk sa bann transpor épi bann travayèr transport. An plis ké sa, nana bann travayèr dann Por. Nana osi bann komèrs, bann patron konm bann travayèr… Konbienn moun i fé sa ? Konbien i sar rète dan la kivète ? In ta èk in paké, sa lé dir.

In kozman pou la rout : « Avan l’èr lé pa l’èr ! apré l’èr lé pi l’èr ! »


La pa bézoin tro zésplikasion pars kan ou lé dann ka, ou i konpran toutsuit . Si ou i réazi pa a tan, malèr pou ou… fé travay zot koko, fé bouy zot matyèr griz, zot va oir si zot i trouv pa in bonpé lo ka konmsa.


Kanalreunion.com