Oté

Konfonn pa lis éléktoral ek lis kandida

Témoignages.re / 11 zanvié 2014

Dépi zordi 10 zanvié 2014, tout moun i giny alé dan tout méri domann lis éléktoral ; sé koué so zistwar ? Sé la lis tout do moun na la droi voté an 2014, a komansé par zéléksyon minisipal, sétadir po élir lo bann konseyi minisipal.

In zour na pa lontan moin la koni in diréktèr lékol té i konfonn lis éléktoral (té po zéléksyon paran zélèv) ék lis kandidatir !

Pran in lézzanp konm in vil 80 000 abitan, li pé avoir 50 000 zéléktèr ; donk son lis éléktoral i kont 50 000 non ; tansyon, si ti ékri 50 non par feyi papié, i fo a toué 1000 feyi ! Komé la i fé pi si papié (kalkil in pé nout foré), i done a toué sa si in CD, ti lir si lordinatèr.

Konfonn pa ék lis kandidatir, nana apé pré 50 non… Zot lé kandida , zot i vé la popilasyon i vot po zot ; nou éspèr zot i vé èt mèr pa riink po lonèr , ni éspèr zot na in programe po lo dévlopman lo péi dan tout domèn, lédikasyon, la kiltir, lékonomi, la plas la Rényon dann loséan indiin, arèt tourn la tèt riink an diréksyon Lérop ; sa lé loin ; pa tout sak i sort laba lé bon po nou.

Rogard sak lo sistèm dépi 1946 la port a nou. Nana sak lété bon pétèt, mé nana osi bonpé la pa minn a riin : ogard tout somaz, zilétré, pov , san lozman ; ogard la sitiasyon bann plantèr , bann zèn diplomé san travayi !

Alé war lo lis éléktoral aprè trouv do moun volontèr é déterminé, militan opiniat, kapab po fé in lis kandida ki travay an ékip, sakinn son konpétans, i kalkil lintéré piblik avan litéré personèl ; mi kroi i trouv ankor bon sitoyin i mazine pa solman zot pos, zot monté sosial a zot mé plito sak lansanm la popilasyon.

Konfonn pa lis éléktoral ek lis kandida !

 Justin 


Kanalreunion.com