Oté

Konm avèk in shifonn papyé !

Justin / 5 mars 2011

Marshann parol ? I di sa kan i done parol in moun épi i réspèk pa. I di galman : « La lang la poin lo zo ! ». Dizon, sa i vé dir a-popré la mèm shoz, pars la lang i pé di toute épi son kontrèr, li di oui épi li di non, li di "yes" épi li di "no". Pou nou, pti kolon, kan ou la fine done parol, i fo ou i réspèk. Sansa, kisa na ankor konfyans dan ou ? L’èr-la, ni anparl pou dmoun normal, pou dmoun ordinèr, mé kan i anparl bann dirizan la politik, lé shoz lé in pé diféran. Ou i pé domandé si zot i done pa zot in l’otorizasyon éspésyal, in droi éspésyal trokaz la vérité.

Mé la pa tou sa, pars nana inn-dé trokaj parol lé grav pou la moral piblik. In légzanp ? Gouvèrnman la di, mèm li la fé mark dann la konstitisyon, kan lo pouvoir santral i domann in koléktivité fé in dépans, dann son non, li va ranbours la koléktivité a l’éro pré, dizon ziska dèrnyé kat-sou. Poitan, dépi Sarkozy lé prézidan épi méssyé Fillon promyé minis, sanm pou moin lé shoz i éspas pa konmsa. L’Etat i doi toute Konsèy zénéral larzan, mé li sousyé pa ranboursé. Pli pir, li fé konmsi li lé dann son bon droi. Arienk pou La Rényon, l’Etat i doi troi-san-sinkant milyon l’éro Konsèy zénéral, é pli pir, li la pa di li va ranboursé. Pa pars li la poin larzan, mé pars li pans Konsèy zénéral nana sak i fo ali pou bien travay. Touléka, sé sak li di.

Ala koman marshann parol i koz. Ala koman, sanm pou moin, kèl ka l’Etat i fé avèk in tèks inportan pou li konm pou nou, vi k’sé la konstitisyon. Dizon, li fé avèk konmsi lété in shifonn-papyé.

 Justin 


Kanalreunion.com