Oté

Konm dé sik dan la plui !

Justin / 9 mars 2010

Pétète zot va dir, mi èm poz késtyon initil… mé, mi èmré savoir pou kossa, kan i sorte La Rényon pou alé dan la Frans, i fatig près pa, mé kan i fé shomin dann l’ote sans, dé-troi zour d’ran, lo kor la pa bon, lé mol, lé fatigué, lé karéman an zobolmouk... Mi èmré savoir si passaz lékouatèr dann sans-la i fatig ossi l’intélizans. Akoz mi di sa ? Pars i diré k’in bann, sak i sorte la mèrtropol, kan i vyin fé kanpagn éléktoral La Rényon, son sèrvo i patine in pé, bokou, a la foli.
Zot i souvyin méssyé Raout, in parti d’la Droite, san pour san, pir pork dizon ? Pa li-mèm la di d’moun Sinpol i fo pa vote pou Uguète Béllo, pars lindi, nora rète aryink troi péi kominis : Kiba, la Koré di Nor épi Sinpol... Estèr sé méssyé Estrozi k’i vyn shé nou épi ki di : « Vergès la pa propriyétèr La Rényon ! ». Fransh vérité, son kozman la pa kass lé kat pate in kanar, i vo mèm pa son poi an kaka sèk.
Alors, mi domann si la poin in danzé koupe lékouatèr o-t’an-ba, dépi lo nor ziska lo side. Mi domann amoin ! Mon tète lété apré shofé la-dsi, kan mon kamarad Zanbash, in boug la pa invante zèf bouyi li-ossi, la di amoin : « Inkyète pa, si in moun la tète lé vide issi, sé k’li té déza vide la-ba », ké li la karéman, konm di lo konte, tyé kouyon pou pran son plas ! Mi koné pa si lé vré, mi koné pa si lé fo, sak mi koné sé ké kozman-la la rassur amoin pars moin té komans an avoir pèr alé dann nor, pou artourn dann sid, é oir mon matyèr griz apré fonn fonn konm dé sik dan la plui.

 Justin 


Kanalreunion.com