Oté

Konm di lo kont : la shias na gro vant !

Justin / 2 févrié 2013

Kan la rivièr Sint-Etiène la kapot son radié, Konsèy réjional la désid arfé in n’ot, pars na tro l’anboutéyaj dan l’androi, pars demoun lé fafigé pèrd lo tan, épi pars shantié-la té i kout sink-san mil ero. In zos pou ronjé pou désètin, in pti kafé, konm bann moun i fé biznès i di, avan la rout définitiv i rouv définitivman. In pé la di, anon atann la fin sézon siklone, nana la di, i fo fé toutsuit. Dan lo fon dé shoz, kisa noré pi pansé in nouvo siklone té i sar ariv konm sa, an vitès épi an misouk ? Sirman pa sak la pran désizion pou fé lo radié.

Mé sak i dové pa arivé l’arivé. Dan la nuit zédi pou trap vandrodi, lo nouvo radié la kasé dsi plis dé-san-sinkant mèt. Mi koné pa si na in sèrtifika konformité pou in n’afèr konm sa. Mi koné pa non pli si la préfèr fé la vitès ké rogard kansréti in pé la solidité. Sak mi koné, sé, dan so Konsèy réjional, na in pé i èm pa tro pran prékosion : bien pèz lo pour, bien pèz lo kont, bien kalkilé é fé travay la rézon. Mé i diré zot i kont dsi zot karma, mé fié la dsi lé pa touzour konséyé. Tout fason, sé pa zot l’arzan zot i dépans, mé sèt La Rénion : alor, pou kosa manié sa an bon pèr d’famiy ?

In n’ot afèr : ziska tro zour, moin l’avé antann dir, in radié lé danzéré, mé sirtou si ou i pas dési kan li lé sibmèrjé. So foi isi, lo radié lé danzéré pou li-mèm. La rivièr lé kapab kalbit ali konm i défons rido magazin èk loto bélié. Tro zour, moin té apré domandé avèk kosa i fé bann radié-la. Na lo sab dodan, na d’lo biensir, mé nana siman ? Sirman, é lo fèr ? Mi pans nana, é son profil, sa lé bien kalkilé sa, son fondasion lé bien fondasioné ? Somanké i fondasione pa tro. Si moin lété Konsèy réjional, mi domann in l’éspèrtiz pou oir si sé la movèz shans l’otèr, sansa si na poin konm in l’érèr.

Astèr, l’anboutéyaj i sar done paké. Kosa i fo fé ? Atann la sézon siklone pasé, sansa arfé in n’ot radié é priyèr Bondié pou k’in n’ot siklone de lo i prézant pa son figir. Zot i koné, konm di lo kont : la shias na gro vant !

 Justin 


Kanalreunion.com