Oté

Konm di lo kont : sak i avans pa i rokil !

Justin / 24 octob 2016

Ala in l’ané i sa fini ankor. Ala in kinkéna i sa fini ankor… é nou dann tousa ? Mi pans pa La Rényon la tro avansé pou trouv solisyon pou tout son bann problèm. Si i fé in sondaz, dann la popilasyon, moin lé sirésèrtin ké la mazorité d’moun va aprouv sak mi sort ékri. Sa i vé pa dir moin na rézon, sa i vé pa dir non pli la mazorité d’moun nana rézon. Sa i vé dir mi rosan lé shoz konmsa é la mazorité d’moun i rosan lé shoz konmsa.

Antansyon, sa i vé pa dir na poin in takon la réisité individyèl. Sa i vé pa dir non pli dann tout famiy napoin désèrtin moun la trap konm i di l’asansèr sosyal, mé fransh vérité, nana demoun an poundak la pran l’asansèr mé lé vré zot la pran sa dann mové sans. Tou lé troi zour na in moun la suisidé ! Tou lé zour demoun la téléfone radyo pou rann kont z’ot mové sor. Tou lé zour nana in kantité dmoun la rakont z’ot ti malèr, zot ti bonèr osi. Dakor, mé kèl koté lo plato balans mésyé Roberval i dsann. Ala ké ni rovien dsi sak i apèl nout rosanti –in pé va di nout rosantiman.

La pa pars moin lé in pé azé é mèm izazé, ké mi rakont sa pars sansa mi rant dann lo sirkui normal lo ronouvèlman : moin lé éné, moin la grandi, moin la vni gramoun é ala lo tan, biento, i sava arivé pou sote l’ot koté la vi. Mé la pa sa mi anparl ! Mi anparl l’éspoir lo pèp mon péi. Ousa li lé ? Kèl koté li la fine alé ? Konm di lo kont : li lé mor dsou pyé tamarin ?

Sak lé déranzan dan sète afèr, sé ké nou nana la kapasité pou ansort anou, pou tir nout péi dann kanal. Nou nan la kapasité pou dévlop nout péi é ni rès an plas, donk ni rokil pars lo kozman i di bien : sak i avans pa, i rokil !


Kanalreunion.com