Oté

Konm i di dann maloya : « ti-pa ti-pa n’arivé ! »

Justin / 3 octob 2012

Matant Zélida la ékrir Justin :
Mon shèr nové, mon spès salté,
Moin té i pans sèryèzman, zot nora parti kashyèt zot tèt dann sab, sansa dsou la tèr, apré lo batlavé zot la gingn dann z’éléksyon l’otro zour. Pars, pou moin, kan in n’afèr konm sa i ariv, i vo myé ou i fé oubli aou. I vo myé ou i anpar lo kou, épi kan mouvman lé bon, ou i arsort déor. Olèrk fé sa, olèrk ékout in konsèy sazès, zot i mèt a bouzé dan tou lé sans : zot lé an konférans par isi, par la-ba, zot lé dann zournal, zot i réinir lo dé grin militan i rèst azot. Ala zordi, zot i fé in l’asanblé zénéral dan La Rivyèr, épi zot i anons in proshin kongré. Siouplé, arèt in pé bouzé konm sa ; mèm zot militan, épi zot mèm, la tèt i doi tourné... San mantir, zot i rapèl amoin in vyé l’èr karnaval lontan. In l’èr té i di konmsa : « Sot koman ti vé koko, toué lé pri dan la min korbo ! ». Tok ! Pran sa pou toi !

Justin la réponn ali :
Mon vyé matant k’i koz touzour la boush rouvèr, si ou té i égzis pa, narté fali invant aou,
Ou i koné, si ou l’avé aprouv anou, moin noré pans nou lé dan l’érèr. Touléka, sé konm sa mi oi lé shoz, é sé in prinsip konduit pou moin. Biensir, kan ou na in z’ènmi, ou sinonsa in l’advèrsèr, i fo méfyé si li komans pas la krèm dan out do... In rényon konm la fé dimansh, in pé i apèl sa in gran mès, mé la pa ninport ki i pé fé in gran mès konm sa, pars si dmoun i suiv pa ou, lé riskab l’égliz i rès vid. Lo moun té la, la pa péy azot pou vni la. Zot l’avé poin arien pou gagné konm avantaz pèrsonèl : té i done pa travay, té i done pa kado... Lo moun té la, l’avé pran zot kart, pèy zot kotizasion. Zot l’avé vni dan l’asanblé zot séksyon. Zot l’avé antann in pé lo bann konférans, zot l’avé sirman lir zournal la rokonstriksyon. Sa in komansman ! Nou la pankor trap lo bi ! Kosa i lé lo bi ? Va trapé so bi-la o moin ? Kan sa va trap so bi-la ? Nou lé ankor loin pétèt. Pétèt ni koné pa ankor kosa i lé lo bi ! Mé konm di lo kont : lo zour nou v’arivé nou va rokonèt ali. Pou l’instan, konm i di dann maloya : ti-pa ti-pa n’arivé. Tok ! Pran sa pou ou !

 Justin


Kanalreunion.com