Oté

Konm i di dann zistoir kolibri : « kosa ou i vé li fé si li fé pa son par ? »

Justin / 23 out 2017

JPEG - 43.6 ko

Matant Zélida la ékrir Justin :

Mon shèr nové, mon spèss salté, rouj-de-fon dovan l’étèrnité, moin lé a d’mandé kosa zot i prétan fèr pou soidizan sov nout l’anvironeman ? La Rényon sé in galé dann l’oséan indien é mèm si èl lété prop san pour san, ou i pé dir amoin si èl n’oré sov l’imanité. Astèr si èl lé sal kom i di dann : « Bann koshon » ou i pans èl nora mète dann danzé tout bann péi dsi la tèr. Dizon La Frans-la métropol, suivan lo mo ou i yèm pa la !- di amoin si èl lété prop a manj atèr, el noré sov limanité ? Si èl lété sal, kouvèr avèk in ta z’ordir, èl nora mète lé z’ot dann danzé. Alé ! Manj m’a péyé don bann rouj-de-fon. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, i étone pa moin antann aou rakont bann balivèrn konmsa . Konm zordi sé mèrkrodi ké ou va sirman oir out bann ti nové ou va rakont azot so zistoir kourt de mon par amoin :

Sa in zistoir l’afrik. L’avé inn foi pou inn bone foi dofé la pran dann la savane é lété si tèlman brilan ké lo lion, lo roi bann z’animo, la désid amenn son bann l’ot koté la rivyèr pou évite fé bril toulmoun. Tout z’animo la travèrs lo flèv épi la parti lo koté ké dofé té pankor prann. Tout la bann, dépité, la gard bril tout z’ot barda. Tout sof inn ! lo pli pti zoizo nana dsi la tèr, lo kolibri. Li la ploye in pti fèy é li la parti aport gout par gout dolo, voiyaz apré voiyaz, pou protèz son kaz. Mi koné pa lo rézilta !

Mé sak mi koné sé ké lo lion la kriye ali, la mèm kriye apré li, la dmann ali kosa li l’apré fé - ti oi pa pti zoizo d’malèr dofé va griye atoué ? Kolibri la pa réponn mé li la kontinyé sak li té apré fé san domann arien pèrsone mé lo rakontèr la di avèk lo lion :« Poufèr ou i kriy konmsa ? Kosa ou i voudré li fé si la pa son par dann travaye ? »

Zistoir-la lé fini sansa li lé pa é shakinn rant nou i pé donn la finisyon li vé. Konm lo kolibri mi di avèk zot : « kosa zot i vé mi fé si la pa lo par sak mi doi fèr ? »-Pétète zistoir la fini, pétète pa ! Touléka ni artrouv pli dvan.


Kanalreunion.com