Oté

Konm i di souvan : l’èr pou fé lé kont i tard pa arivé !

Justin / 31 out 2015

Oplis zéléksyon réjyonal i avans, oplis I antan parl bann problèm, bann éskandal, I antan parl tout sort kanikrosh demoun té I dovine mèm pa. I fo dir bann media la pa di tro gran-shoz : mi vé pa dir La Réjyon l’avé angrès azot in pé pou ashté z’ot silans mé mi trouv lé in pé konmsa. Konm di kréol :”I krash pa dann out pla d’ ri !”.

Sa la dir pandan sink z’ané, I dir ankor in pé, mém si tazantan in pti vérité i sort d’isi d’la-ba. Ni vé, ni vé pa, v’ariv l’èr pou fé lo bilan. Romark kan la mandatir Paul Vergès té fini, pèrsone la pa fé lo bilan poitan n’oré té in n’afèr intérésan..kansréti pou fé la konparézon rant sak li la fé épi sak son siksésèr la fé, i fé ankor zordi dann l’intansion kass tout épi ranplas par n’inport koi.

Sak moin lé sir sé k’inn li va rant dann l’istoir pou son vizyon par raport la Rényon, par raport l’oséan indien é par raport lo mond antyé : sa sé pou Paul Vergès, pou in bonpé d’rézon moin la poin si tan tèlman la plas pou mark isi. Sak mi oi dovan moins sé ké dopi près vintan li domann lo mond pou fé antansion pars lé apré mète l’imanité dann danzé d’mor. In pé i sousyé pa d’sa mé poitan tout i doi donn la min pou tir anou la-dan. Lé irzan, sé lo priorité an parmi bann priorité. Sansa pou kosa noré fé konférans par dsi konférans é pa pli loin ké moi d’désanm dann Pari.

Tanka lo Didier Robert, konm i di souvan : Tardra viendra, l’èr pou fé lé kont i tard pa pou arivé.


Kanalreunion.com