Oté

Konm in lasanblé inik pétèt !

J.B. / 29 zanvié 2015

Dann in pé mwin dé mwa ni sar voté, néna i prévwa klo péizaz politik la rényon i sar sanzé èk sa. O bout nou nora in nouvo lasamblé départmantal pou ranplass lo konsèy zénéral an plass. Konm i lé i konvyin pi i prétan. Zéléksyon lé prévi pou lo 22 èk lo 29 mars. Ni koné pa kosa va sorti boudikont é ni koné pa touzour zordi poukoué ni sar voté vik zordi ankor ni gnor kèl konpétans nora lo nouvo lasanblé. La fé in léspèss réform, pou fé antrot in pé lékonomi larzan. Vèy pa koman i nyabou ? I ranplass 49 canton déza la par 25 nouvo, rod pa koman la rodékoupé, in bout isi in bout la ba.

O liék an awar 25 éli so kou si ni rotrouv a nou èk 50, dé zéli par kanton, in bononm èk in fanm pou réspèk la parité. In bononm èk in fanm an titilèr, in bononm èk in fanm an sipléan, boudikont i fo kat po trouv lo kont. Ala koman ni sar fé lékonomi larzan pou vréman ! Sak lé la i réponn pi, konm lo systèm li dwa èt a bou d’souf pétèt. Défwa mi domand a mwin si ni marsh pa si la tèt èk tout so konplikasyon la. Koman ni pé artrouv a nou dan so lanboutéyaz ? Ant la kominn, lo lasanblé déparmantal, lo konsèy rézyonal, la kominoté d’kominn, lo létat li minm.

Ni sar voté san konèt la konpétans lo nouvo lasanblé. Di kou nou minm ni koné pi èk ki ni kass lanbordir pou règ nout problinm, kisa na konpétans pou rèy nout shomaz, kisa na konpétans pou fé la kaz, kisa na konpétans pou lagrikiltir, kisa na konpétans pou kann, kisa na konpétans pou nout kiltir… Pétèt, in lidé ki vyin a mwin konm sa toudinkou, pétèt in léstati èk tout konpétans konm mwin la di la bon o, pétèt in nafèr ki rogroupré tout konpétans, konm in lasanblé inik pétèt !


Kanalreunion.com